સમગ્ર વિશ્વમાં કોરોનાનો કહેર જોવા મળી રહ્યો છે. ત્યારે ન્યૂયોર્ક ટાઈમ્સના એક રિપોર્ટ પ્રમાણે, સાઉદી અરબના શાહી પરિવારના 150 સભ્યોમાં કોરોનાનું સંક્રમણ સામે આવ્યું છે. ત્યાર બાદ ક્રાઉન પ્રિન્સ મોહમ્મદ બિન સલમાન આઈસોલેશનમાં ગયા છે. 70 વર્ષીય સાઉદી પ્રિન્સ ફૈઝલ બિન બન્દર બીન અબ્દુલઝીઝ અલ સૌદ કે જેઓ રિયાધ કેપિટલના ગવર્નર છે તેઓ વાયરસની ચપેટમાં આવ્યા બાદ અત્યારે આઈસીયુમાં એડમિટ છે તેવું મીડિયા રિપોર્ટ્સ પ્રમાણે જાણવા મળ્યું છે.

કિંગ સલમાન અત્યારે આઈસોલશનમાં છે. મોટી રેન્કના રોયલ સભ્યો તેમજ નીચલી રેન્કના અધિકારીઓ પણ કોરોના વાયરસથી સંક્રમિત છે. અત્યારે કિંગ ફૈઝલ સ્પેશ્યિાલિટી હોસ્પિટલના ડોક્ટર શાહી પરિવારના ઈલાજમાં લાગેલા છે અને હોસ્પિટલમાં વધારાના 500 બેડ તૈયાર કરવામાં આવી રહ્યા છે. હોસ્પિટલના એક નિવેદન પ્રમાણે, સમગ્ર દેશમાંથી આવી રહેલા વીઆઈપી લોકો માટે વ્યવસ્થા તૈયાર કરવામાં આવી રહી છે.

એક રિપોર્ટ પ્રમાણે, હોસ્પિટલના ડોક્ટર્સને એક હાઈ અલર્ટ મેસેજ મળ્યો હતો. મેસેજમાં કહેવામાં આવ્યું હતું કે, ટોપ અર્જન્ટ કેસ માટે હોસ્પિટલમાં પૂરતી વ્યવસ્થા કરવામાં આવે જે શાહી પરિવાર સાથે જોડાયેલા છે. રિયાદની આ હોસ્પિટલમાં કોઈ સંક્રમિત સ્ટાફને રાખવામાં નહીં આવે. માત્ર શાહી પરિવારના સભ્યોને જ ચિકિત્સા પૂરી પાડવામાં આવશે.