Coronavirus New Variant: છેલ્લા બે વર્ષથી કોરોના વાયરસ સમગ્ર વિશ્વ માટે સમસ્યા બની ગયો છે. કોરોનાના ઘણા નવા પ્રકારો પણ સામે આવ્યા છે. કોરોના વાયરસનો નવો વેરિઅન્ટ ઓમિક્રોન વિશ્વભરમાં ઝડપથી ફેલાઈ રહ્યો છે. ભારતમાં પણ ઓમિક્રોનના કેસ ઝડપથી વધી રહ્યા છે, જે ચિંતાનો વિષય છે.
હવે તાજેતરમાં જ ફ્રાન્સમાં કોરોનાનું બીજું વેરિયંટ સામે આવ્યું છે. IHU Mediterranee Infection ઇન્સ્ટિટ્યૂટના કેટલાક વૈજ્ઞાનિકોએ આ નવો વેરિઅન્ટ B.1.640.2 શોધી કાઢ્યો છે. વૈજ્ઞાનિકોના જણાવ્યા અનુસાર નવા વેરિઅન્ટમાં 46 મ્યુટેશન જોવા મળ્યા છે. જે ઓમિક્રોન કરતાં વધુ છે.
ફ્રાંસના માર્સેલીમાં કોરોનાના નવા વેરિઅન્ટ B.1.640.2 ના 12 થી વધુ કેસ મળી આવ્યા છે. આ તમામ લોકો આફ્રિકન દેશ કેમરૂનથી પ્રવાસ કરીને પરત ફર્યા છે. અમેરિકન વૈજ્ઞાનિક એરિક ફીગલ-ડિંગે પણ ફ્રાન્સમાં મળી આવેલા કોરોનાના નવા પ્રકાર અંગે ચિંતા વ્યક્ત કરી છે. તેણે અનેક ટ્વિટ કર્યા છે, જેમાં આ નવા વેરિઅન્ટનો ઉલ્લેખ કરવામાં આવ્યો છે. જો કે, તેણે એમ પણ કહ્યું છે કે આ નવું વેરિઅન્ટ જે ફ્રાન્સમાં મળ્યું છે તે ઓમિક્રોન કરતા ઓછું જોખમી હોઈ શકે છે.
ફ્રાન્સમાં જોવા મળેલો કોરોનાનો નવો વેરિએન્ટ હજુ સુધી અન્ય કોઈ દેશમાં જોવા મળ્યો નથી. અત્યાર સુધી આ અંગે WHO તરફથી કોઈ માહિતી બહાર આવી નથી. હાલમાં ઉપયોગમાં લેવાતી મોટાભાગની રસીઓ SARS-Cov-2 ના સ્પાઇક પ્રોટીનને લક્ષ્ય બનાવે છે. આ વાયરસ આ પ્રોટીનને કોષોમાં પ્રવેશવા અને ચેપનું કારણ બને છે. N501Y અને E484K મ્યુટેશન અગાઉ બીટા, ગામા, થીટા અને ઓમિક્રોન સ્વરૂપોમાં પણ જોવા મળ્યા હતા.
ભારતમાં શું છે કોરોનાની સ્થિતિ
દેશમાં ફરી એકવાર કોરોનાના કેસો વધી રહ્યા છે. છેલ્લા 24 કલાકમાં કોરોનાના 37,379 નવા કેસ નોંધાય હતા. જ્યારે તેની સામે 11,007 લોકોએ કોરોનાને મ્હાત આપી હતી. તો 124 લોકોના કોરોનાને કારણે મોત નીપજ્યા હતા. દેશમાં અત્યારે કોરોનાના કુલ કેસ 3,49,60,261 છે, જ્યારે 1,71,830 એક્ટિવ કેસ છે. દેશમાં ઓમિક્રોનના કુલ 1892 કેસ નોંધાયા. જેમાંથી 766 લોકોને ડિસ્ચાર્જ કરાયા હતા. અત્યાર સુધીમાં 3,43,06,414 લોકોએ કોરોનાને મ્હાત આપી છે. તો અત્યાર સુધીમાં કુલ 4,82,017 લોકોના મોત નીપજ્યા છે. જ્યારે અત્યાર સુધીમાં કુલ 1,46,70,18,464 લોકોનું રસીકરણ કરાયું છે.