zurich talks suspended: અમેરિકાના રાષ્ટ્રપતિ ડોનાલ્ડ ટ્રમ્પની સીધી ધમકીઓ બાદ અમેરિકા અને ઈરાન વચ્ચે સ્વિટ્ઝર્લેન્ડમાં ચાલી રહેલી હાઈ-લેવલ શાંતિ વાટાઘાટો જોખમમાં મુકાઈ ગઈ છે. મીડિયા રિપોર્ટ્સ અનુસાર, ડોનાલ્ડ ટ્રમ્પના આક્રમક વલણથી ગુસ્સે ભરાયેલા ઈરાની પ્રતિનિધિમંડળે બેઠક સ્થળ છોડી દીધું છે, જેના કારણે બંને દેશો વચ્ચેની ચર્ચા અધવચ્ચે જ અટકી ગઈ છે. ટ્રમ્પે ઈરાનને ચેતવણી આપી હતી કે જો તે લેબનોનમાં હિઝબુલ્લાહ અને અન્ય સંગઠનોને રોકશે નહીં તો અમેરિકા તેના પર અત્યાર સુધીનો સૌથી મોટો હુમલો કરશે. આ ધમકીના જવાબમાં ઈરાને પણ આકરો પ્રતિકાર કરતા પોતાની સેનાને કોઈપણ હુમલાનો જવાબ આપવા માટે હાઈ એલર્ટ પર મૂકી દીધી છે.
માત્ર 80 મિનિટ ચાલી શકી બેઠક
પાકિસ્તાન અને કતારની મધ્યસ્થતા હેઠળ સ્વિટ્ઝર્લેન્ડના ઝુરિચમાં બંને દેશો વચ્ચે આ મહત્વની વાટાઘાટો શરૂ થઈ હતી. પરંતુ, ટ્રમ્પના નિવેદન બાદ રવિવારે આ ચર્ચાને અસ્થાયી રૂપે રોકી દેવી પડી છે. આ બેઠકનો પ્રથમ રાઉન્ડ માત્ર 80 મિનિટ સુધી જ ચાલી શક્યો હતો. ઇરાની સ્ટેટ ટેલિવિઝનના જણાવ્યા મુજબ, આ ટૂંકી વાતચીત દરમિયાન બંને દેશો વચ્ચે પરમાણુ કાર્યક્રમ અંગે કોઈ ચર્ચા થઈ નહોતી. આખી ચર્ચા માત્ર તેહરાન અને વોશિંગ્ટન વચ્ચેના એમઓયુ (MoU) ના અમલીકરણ અને લેબનોનની વર્તમાન પરિસ્થિતિ પર જ કેન્દ્રિત હતી.
ડોનાલ્ડ ટ્રમ્પે શું આપી હતી ધમકી?
વાટાઘાટો દરમિયાન અમેરિકી રાષ્ટ્રપતિ ડોનાલ્ડ ટ્રમ્પે ઈરાન પર દબાણ લાવતા કહ્યું હતું કે, "ઈરાને લેબનોનમાં સક્રિય તેના પ્રોક્સી સંગઠનોને મુશ્કેલીઓ ઊભી કરતા તાત્કાલિક રોકવા જોઈએ, કારણ કે તેમને તેહરાન તરફથી મોટું ફંડ મળે છે. જો ઈરાન તેમને રોકવામાં નિષ્ફળ જશે, તો અમે ગયા અઠવાડિયે કર્યો હતો તેના કરતાં પણ વધુ શક્તિશાળી અને મોટો સૈન્ય હુમલો ઈરાન પર કરીશું."
આ પણ વાંચોઃ ઈરાને ફરી બંધ કર્યું 'હોર્મુઝ સ્ટ્રેટ', અમેરિકા-ઈઝરાયેલ પર લગાવ્યો વિશ્વાસઘાતનો આરોપ
ઈરાનનો અમેરિકાને જડબાતોડ જવાબ
અલ જઝીરાના અહેવાલ મુજબ, ઈરાનના મુખ્ય વાટાઘાટકાર મોહમ્મદ ગાલિબાફે અમેરિકાની આ ધમકીઓને સદંતર ફગાવી દીધી છે. તેમણે અમેરિકાને પોતાના નિવેદનો પ્રત્યે સાવધ રહેવાની ચેતવણી આપતા જણાવ્યું કે, "અમેરિકાની આવી ગર્ભિત ધમકીઓથી ઈરાન ડરવાનું નથી. અમારી સેના કોઈપણ પ્રકારના વિદેશી હુમલાનો સામનો કરવા અને તેનો જડબાતોડ જવાબ આપવા માટે પૂરતી સક્ષમ અને સંપૂર્ણ તૈયાર છે." ઈરાન આ મંત્રણા અધવચ્ચે છોડીને ચાલ્યું જતાં હવે આંતરરાષ્ટ્રીય સ્તરે બંને દેશો વચ્ચે તણાવ વધુ વધવાની આશંકા સેવાઈ રહી છે.
આ પણ વાંચોઃ વેનેઝુએલા-ઈરાન પછી અમેરિકાના નિશાના પર કયો દેશ? ડોનાલ્ડ ટ્રમ્પના ઈન્ટરવ્યુથી ખળભળાટ