અમેરિકાની મોટી ફાર્મા કંપની ફાઈઝરના સીઈઓ અલ્બર્ટ બૂર્લાનો દાવો છે કે, બધુ જ ધાર્યા પ્રમાણે યોગ્ય રીતે થશે તો ઓક્ટોબર સુધીમાં વેક્સીનના લાખો ડોઝ તૈયાર કરીને સપ્લાઈ કરી દેવામાં આવશે, કંપનીએ જે વેક્સીન તૈયાર કરી છે, તેને BNT162 નામ આપવામાં આવ્યું છે.
આ વેક્સીનનો પહેલો ડોઝ 5 માર્ચે જર્મનીમાં માનવી પર ક્લીનિકલ ટ્રાયલ કરવામાં આવી હતી. ટાઈમ્સ ઓફ ઈઝરાયલ સાથેની વાતચીતમાં આલ્બર્ટ બૂર્લાએ કહ્યું હતું કે, જો બધુ જ બરાબર થશે અને ભાગ્ય અમારો સાથ આપશે તો અમારી પાસે પૂરતા પૂરાવા છે કે, અમે સુરક્ષિત અને અસરકારક કોરોના વાયરસની દવા આ વર્ષના ઓક્ટોબર સુધીમાં તૈયાર કરી શકીએ છીએ.
ફાઈઝર કંપની હાલમાં ચાર અલગ અલગ પ્રકારની વૈક્સીન પર કામ કરી રહી છે. કંપનીને આછા છે કે, જૂન કે જૂલાઈ સુધીમાં એ સ્પષ્ટ થઈ જશે કે, કઈ વેક્સીન સૌથી વધુ અસરકારક અને સુરક્ષિત છે. તેના માટે ફાઈઝર ડેટા ભેગા કરીને તેનું વિશ્લેષણ કરી રહ્યું છે.