US-India Vs China:ભારત અને અમેરિકા વચ્ચે એક મોટી ડિફેન્સ ડીલ થઈ છે. માનવામાં આવી રહ્યું છે કે આ ડીલ બાદ બંને દેશોના સંબંધો એક ડગલું આગળ વધશે. અમેરિકી રાષ્ટ્રપતિ જો બાઈડેનના વહીવટીતંત્ર દ્વારા જાહેરાત કરવામાં આવી છે કે ભારત માટે GE લશ્કરી એન્જિનોને મંજૂરી આપવામાં આવી છે. 98 કિલો ન્યૂટન થ્રસ્ટ સાથેનું GE-414 એન્જિન ફાઈટર જેટ્સની કરોડરજ્જુ કહેવાય છે. બાઈડેન વહીવટીતંત્રને આશા છે કે આ ડીલ બાદ ચીન સામે સૈન્ય ઉપકરણો, સેમિકન્ડક્ટર્સ અને આર્ટિફિશિયલ ઈન્ટેલિજન્સનો મજબૂત ઘેરો બનાવવામાં આવશે.
તેજસને મળશે બળ
આ એન્જીનનું ઉત્પાદન ભારતમાં ડિફેન્સ રિસર્ચ એન્ડ ડેવલપમેન્ટ ઓર્ગેનાઈઝેશન (DRDO) અને અન્ય ખાનગી ક્ષેત્રની કંપની સાથે મળીને કરવામાં આવશે. GE-414INS6 એન્જિન લાઇટ કોમ્બેટ જેટ (LCA) તેજસના માર્ક II વર્ઝનને પાવર આપશે. આ વર્ઝન આવતા વર્ષ સુધીમાં લોન્ચ કરવામાં આવશે. આ જેટ વર્ષ 2024 ના અંતથી ઉડવાનું શરૂ કરશે.
અધિકારીઓના જણાવ્યા અનુસાર, આ ડીલ ઘણા વિમાનોમાં ફેરફાર માટે એક મોટી તક બનવા જઈ રહી છે. તેમનું કહેવું છે કે, આ ડીલ વાસ્તવમાં ગેમ ચેન્જર સાબિત થશે. તેમના મતે આ પ્રકારનો કરાર અન્ય કોઈની સાથે ક્યાંય કરવામાં આવ્યો નથી.
ભારતને ટેકનોલોજી મળશે
આ ડીલની સૌથી મહત્વની વાત ટ્રાન્સફર ઓફ ટેક્નોલોજી છે, જેના પર હજુ સુધી કંઈ કહેવામાં આવ્યું નથી. પરંતુ જો સૂત્રોનું માનીએ તો GE-414 એન્જિન ભારતમાં 100 ટકા ટેક્નોલોજી ટ્રાન્સફર સાથે બનાવવામાં આવશે. એવું કહેવામાં આવી રહ્યું છે કે, ભારતના રાષ્ટ્રીય સુરક્ષા સલાહકાર (NSA) અજીત ડોભાલના અમેરિકા પ્રવાસ દરમિયાન જ આ કરાર પર મહોર લાગી શકે છે.
ભારત-યુએસ સંબંધો
અધિકારીઓના મતે ભારતમાં મહાસત્તા બનવાની તમામ ક્ષમતાઓ છે. તે એક એવો દેશ બની ગયો છે જે કોઈ દેશની નજીક નથી. પરંતુ ઈન્ડો-પેસિફિક ક્ષેત્ર સાથે સંકળાયેલા હિતો તેને અમેરિકાની નજીક લઈ જઈ રહ્યા છે. આ તે ભાગ છે જ્યાં ચીન ખૂબ જ આક્રમક બની ગયું છે. તે દરેક સમયે આ વિસ્તારનો લાભ લેવા આતુર રહે છે.
અમેરિકા ઈચ્છે છે કે અન્ય દેશોની કંપનીઓ ચીનની હુવેઈ ટેક્નોલોજી સામે તૈયાર થાય. આ માટે તે ભારતના કમ્પ્યુટર ચિપ નિષ્ણાતોને અમેરિકા બોલાવવા તૈયાર છે. જ્યારે તે ભારતીય અને અમેરિકન કંપનીઓને આર્ટિલરી સિસ્ટમ્સ જેવા લશ્કરી સાધનો પર ખર્ચ કરવા માટે પ્રોત્સાહિત કરવા આતુર છે.