US-Iran Talks 2.0: પશ્ચિમ એશિયામાં ફરી એકવાર યુદ્ધના વાદળો ઘેરાયા છે. અમેરિકા અને ઈરાન વચ્ચે પાકિસ્તાનમાં મંત્રણા 2.0 ની ચર્ચાઓ ચાલી રહી છે, ત્યાં જ અમેરિકન રાષ્ટ્રપતિ ડોનાલ્ડ ટ્રમ્પે ઈરાનને ખુલ્લી ધમકી આપી દીધી છે. ટ્રમ્પ હવે 'કરો યા મરો' ના મૂડમાં છે અને સ્પષ્ટ કરી દીધું છે કે જો બંને દેશો વચ્ચે કોઈ સારો કરાર (ડીલ) નહીં થાય, તો યુદ્ધ અને ઈરાનનો વિનાશ નિશ્ચિત છે. ચાલો જાણીએ આ સમગ્ર મામલે અત્યારે શું અપડેટ છે અને ટ્રમ્પે પોતાના નિવેદનમાં શું કહ્યું છે.
ટ્રમ્પની ઈરાનને સીધી ધમકી: "હવે કોઈ વિકલ્પ નથી"
અમેરિકા અને ઈરાન વચ્ચેનો વિવાદ હજુ પણ ઉકેલાતો દેખાતો નથી. મંગળવારે (21 એપ્રિલ) ડોનાલ્ડ ટ્રમ્પે તેહરાનને છેલ્લું અલ્ટીમેટમ આપતા કહ્યું કે હવે ઈરાન પાસે સમાધાન કરવા સિવાય બીજો કોઈ જ વિકલ્પ બચ્યો નથી. તેમણે સ્પષ્ટ કર્યું કે તેઓ હવે યુદ્ધવિરામ (Ceasefire) લંબાવવાના કોઈ જ મૂડમાં નથી. જો બંને દેશો વચ્ચે કોઈ યોગ્ય સમજૂતી નહિ સધાય તો યુદ્ધ થવું નક્કી છે.
"અમે પહેલા કરતા વધુ તાકાતવર છીએ"
CNBC ન્યૂઝ ચેનલ સાથે વાતચીત કરતા ટ્રમ્પે કહ્યું, "હોર્મુઝ સ્ટ્રેટ (Hormuz Strait) પર અત્યારે અમારું સંપૂર્ણ નિયંત્રણ છે. મને પૂરો વિશ્વાસ છે કે અમે આખરે એક બહુ સારી ડીલ સુધી પહોંચી શકીશું, કારણ કે તેમની (ઈરાન) પાસે બીજો કોઈ રસ્તો જ નથી." ટ્રમ્પે પોતાની તાકાત બતાવતા ઉમેર્યું કે, "અમે સંપૂર્ણ રીતે સશસ્ત્ર છીએ. યુદ્ધવિરામ પહેલા અમે જેટલા શક્તિશાળી હતા, તેના કરતા અત્યારે ઘણા વધારે તાકાતવર છીએ."
"ડીલ નહિ તો ઈરાનનો વિનાશ પાક્કો"
ટ્રમ્પે પોતાની વાત પર ભાર મુકતા કહ્યું કે જો કોઈ સોદો નહિ થાય તો ઈરાનને બહુ મોટું નુકસાન વેઠવું પડશે. તેમણે એક મોટો ખુલાસો કરતા એમ પણ કહ્યું કે, "અમે આ યુદ્ધવિરામના સમયનો ઉપયોગ અમારા હથિયારોનો ભંડાર ફરીથી ભરવા માટે કર્યો છે. કદાચ તેમણે (ઈરાને) પણ થોડો સંગ્રહ કર્યો હશે. પણ હું હવે આ યુદ્ધવિરામ લંબાવવા માંગતો નથી, મને એક સારી ડીલ જોઈએ છે. અમે તો પહેલેથી જ યુદ્ધ જીતી ગયા છીએ."
અમેરિકા ઈરાન વાટાઘાટો 2.0 નું લેટેસ્ટ અપડેટ શું છે?
તમને જણાવી દઈએ કે અમેરિકા અને ઈરાન વચ્ચે વાટાઘાટોનો પહેલો રાઉન્ડ સંપૂર્ણપણે સફળ રહ્યો ન હતો. ટ્રમ્પના જણાવ્યા અનુસાર, ઘણા મુદ્દાઓ પર સહમતી બની ગઈ હતી, પરંતુ હોર્મુઝ અને પરમાણુ કાર્યક્રમના મુદ્દે વાત અટકી ગઈ હતી. હવે બીજા રાઉન્ડની વાતચીત માટે ચર્ચા ચાલી રહી છે.
સોમવાર રાત (20 એપ્રિલ) સુધીમાં 10 જેટલા યુએસ C 17 વિમાનો પાકિસ્તાન પહોંચી ગયા છે. એવો પણ દાવો થઈ રહ્યો છે કે અમેરિકાના ઉપરાષ્ટ્રપતિ જેડી વાન્સ પણ આ વાટાઘાટોના બીજા રાઉન્ડમાં ભાગ લેશે, જોકે હજુ તેની સત્તાવાર પુષ્ટિ થઈ નથી. આ બધાની વચ્ચે, ઈરાને હજુ સુધી આ બીજી વખતની વાટાઘાટો માટે પોતાની સંમતિ આપી નથી.