આ એક્ટ્રેસના પિતા આતંકી સાથેની અથડામણમાં થયા હતા શહીદ, એક સમયે કેબના પણ પૈસા નહોતા

આ અભિનેત્રીએ માત્ર બોલિવૂડમાં જ નહીં પરંતુ હોલિવૂડની ફિલ્મોમાં પણ પોતાની મજબૂત અભિનય કુશળતા સાબિત કરી છે. જોકે, આ અભિનેત્રીએ પોતાના જીવનમાં ઘણા ઉતાર-ચઢાવ બાદ સફળતા મેળવી છે. સંઘર્ષના દિવસોમાં તેમને ઘણી મુશ્કેલીઓનો સામનો કરવો પડ્યો હતો. ત્યારબાદ એક સુપરસ્ટાર સાથેની ફિલ્મે આ અભિનેત્રીને ઈન્ડસ્ટ્રીમાં ઓળખ અપાવી હતી. અમે જે અભિનેત્રીની વાત કરી રહ્યા છીએ તે બીજું કોઈ નહીં પણ નિમરત કૌર છે. નિમરતે પોતાની મહેનતના દમ પર આજે ફિલ્મોમાં પોતાની ઓળખ બનાવી છે.

નિમરત કૌરનો જન્મ 13 માર્ચ 1982ના રોજ રાજસ્થાનના પિલાનીમાં એક શીખ પરિવારમાં થયો હતો. તેમના પિતા મેજર ભૂપિન્દર સિંહ ભારતીય સેનાના અધિકારી હતા. પિતા આર્મીમાં હોવાને કારણે નિમરત થોડા વર્ષો શહેરો અને શાળાઓ બદલતી રહી હતી. 1994માં જ્યારે તે માત્ર 11 વર્ષની હતી ત્યારે તેના પિતાનું આતંકવાદીઓ દ્વારા અપહરણ કરીને હત્યા કરવામાં આવી હતી. તે સમયે તેનો પરિવાર પટિયાલામાં રહેતો હતો. તેના પિતા આતંકવાદી અથડામણમાં શહીદ થયા પછી નિમરત તેની માતા અવિનાશ કૌર અને નાની બહેન રૂબિના કૌર સાથે નોઈડા શિફ્ટ થઈ ગઈ હતી.

અભિનેત્રી બનવા માટે મુંબઈ જતા પહેલા નિમરતે પ્રતિષ્ઠિત સંસ્થા દિલ્હી પબ્લિક સ્કૂલ, નોઈડા અને શ્રી રામ કોલેજ ઓફ કોમર્સ, દિલ્હી યુનિવર્સિટીમાં અભ્યાસ કર્યો હતો. નિમરતે સૌપ્રથમ એક મોડેલ તરીકે તેની કારકિર્દીની શરૂઆત કરી અને પછી તેણીએ તેની અભિનય કુશળતાને નિખારવા માટે થિયેટર પણ કર્યું હતું.નિમરતને શરૂઆતના દિવસોમાં ઘણો સંઘર્ષ કરવો પડ્યો હતો. પિંકવિલાને આપેલા એક ઈન્ટરવ્યૂમાં નિમરતે જણાવ્યું હતું કે અભ્યાસ કર્યા બાદ તે મુંબઈ આવી હતી. કામ માટે તેણે તેના ફોટોગ્રાફ્સ ક્લિક કર્યા અને 100 એજન્સીઓને આપ્યા હતા. અભિનેત્રીએ જણાવ્યું હતું કે તે પોતે તસવીરો આપવા જતી હતી.

નિમરતે એમ પણ કહ્યું હતું કે તે દિવસોમાં તેની પાસે કેબના પૈસા પણ નહોતા. મોબાઈલથી ઘરે ફોન કરવો પણ તેના માટે મોંઘો હતો, તેથી તે પીસીઓ પર જઇને ફોન કરીને તેની માતા સાથે વાત કરતી હતી. અભિનેત્રીએ સંઘર્ષથી ભરેલા આ દિવસોને ખૂબ જ પડકારજનક ગણાવ્યા હતા. 2004માં નિમરત કુમાર સાનુના ‘તેરા મેરા પ્યાર’ અને શ્રેયા ઘોષાલના ‘યે ક્યા હુઆ’ મ્યૂઝિક વીડિયોમાં જોવા મળી હતી.

2005માં નિમરત શૂજિત સરકારની યુદ્ધ ડ્રામામાં જોવા મળી હતી. તેણે 2006માં અંગ્રેજી ફિલ્મ ‘વન નાઈટ વિથ ધ કિંગ’થી પોતાના ફિલ્મી કરિયરની શરૂઆત કરી હતી. નિમરતને 2012માં વાસન બાલા દ્વારા નિર્દેશિત અને અનુરાગ કશ્યપ દ્વારા નિર્મિત ‘પેડલર્સ’માં તેની પ્રથમ મુખ્ય ભૂમિકા મળી હતી. જોકે આ ફિલ્મ ક્યારેય રિલીઝ થઈ નથી.

આ પછી 2013માં નિમરતે ‘ધ લંચબોક્સ’માં તેના શ્રેષ્ઠ અભિનયથી સફળતા મેળવી. રિતેશ બત્રા દ્વારા નિર્દેશિત અને ઇરફાન ખાન અને નવાઝુદ્દીન સિદ્દીકી અભિનીત આ ફિલ્મને 21મી સદીની શ્રેષ્ઠ ભારતીય ફિલ્મોમાંની એક ગણવામાં આવે છે.

નિમરત કૌરે 2016માં આવેલી ફિલ્મ એરલિફ્ટમાં અક્ષય કુમાર સાથે કામ કર્યા બાદ લોકપ્રિયતા મેળવી હતી. ત્યારબાદ તે 2022ની ફિલ્મ ‘દસવી’માં અભિષેક બચ્ચન સાથે અને 2023ની ફિલ્મ સાજિની શિંદેના વાયરલ વીડિયોમાં જોવા મળી હતી. નિમરત આંતરરાષ્ટ્રીય શો હોમલેન્ડ, વેવર્ડ પાઈન્સ એન્ડ ફાઉન્ડેશન અને ભારતીય વેબ સિરીઝ ‘ધ ટેસ્ટ કેસ’ અને ‘સ્કૂલ ઓફ લાઈઝ’નો પણ ભાગ રહી ચુકી છે.