બજારમાં વેચાઈ રહી છે ત્રણ નકલી દવાઓ, કેલ્શિયમ-વિટામીન ડી સહિત 56 દવાઓની ગુણવત્તા ખરાબ

નિયમિત નિયમનકારી મોનિટરિંગ પ્રવૃત્તિ મુજબ, સીડીએસસીઓ પોર્ટલ પર દર મહિને બિન-માનક ગુણવત્તા (NSQ) અને નકલી દવાઓની સૂચિ બહાર પાડવામાં આવે છે.

ઑક્ટોબરના અહેવાલ મુજબ, સેન્ટ્રલ ડ્રગ લેબોરેટરીઝ દ્વારા પરીક્ષણ કરાયેલ 56 દવાના નમૂનાઓની ગુણવત્તા બિન-માનક હોવાનું જણાયું હતું. તે જ સમયે, તપાસ દરમિયાન ત્રણ દવાઓ નકલી મળી આવી હતી.

નોંધનીય છે કે સીડીએસસીઓ દ્વારા દર મહિને આ પરીક્ષણ કરવામાં આવે છે, જેમાં બજારમાં ઉપલબ્ધ દવાઓના નમૂના લેવામાં આવે છે અને તેનું પરીક્ષણ કરવામાં આવે છે.

ઓક્ટોબરની યાદીમાં, 56 દવાઓ બિન-માનક ગુણવત્તાની મળી આવી હતી, જેમાં કેલ્શિયમ 500, વિટામિન D3 250, IU ટેબ્લેટ IP, સિપ્રોફ્લોક્સાસીન ટેબ્લેટ USP 500, Aceclofenac, Paracetamol ગોળીઓ જેવી દવાઓનો સમાવેશ થાય છે. હાલમાં નકલી દવાઓના નામો જાણવા મળ્યા નથી.

દર મહિને કરવામાં આવતી આ તપાસ બાદ ઘણી દવાઓ સામે આવે છે, ત્યારબાદ તે કંપનીઓના જવાબ પણ આવે છે. જે દવાઓના સેમ્પલ લેવામાં આવ્યા છે તેની બેચ બજારમાં વેચાણ માટે ઉપલબ્ધ છે. ગયા મહિને પણ, CDSCO ના સપ્ટેમ્બર રિપોર્ટમાં સૌથી વધુ વેચાતી કફ સિરપ, મલ્ટીવિટામિન, એન્ટી એલર્જી વગેરે સહિતની 49 દવાઓ ગુણવત્તાના માપદંડો પર નિષ્ફળ ગઈ હતી.

DCGI રાજીવ સિંહ રઘુવંશીએ જણાવ્યું હતું કે જો કોઈ દવા પરીક્ષણના માપદંડોમાં નિષ્ફળ જાય તો તે પ્રમાણભૂત ગુણવત્તાની હોવાનું કહેવાય નહીં. આના પરથી સમજાય છે કે જે કંપનીએ આ દવા બનાવી છે તેની બેચની દવા ધોરણ મુજબની નથી. આવી કંપનીઓને નોટિસ આપવામાં આવે છે.