CSK Share Price: શેરબજારમાં ધોનીની ધૂમ, માલામાલ થઈ રહ્યા છે સીએસકેના શેરહોલ્ડર

કૅપ્ટન કૂલ તરીકે જાણીતા મહેન્દ્ર સિંહ ધોનીની કૅપ્ટન્સી હેઠળ ચેન્નાઈ સુપર કિંગ્સે વધુ એક IPL ટ્રોફી જીતી છે. ચેન્નાઈ સુપર કિંગ્સે સોમવારે રાત્રે રમાયેલી ફાઈનલ મેચમાં ગુજરાત ટાઈટન્સને હરાવીને રેકોર્ડ પાંચમી વખત જીત મેળવી હતી. ધોનીની ટીમનું શાનદાર પ્રદર્શન માત્ર આઈપીએલ પૂરતું મર્યાદિત નથી. CSK પણ શેરબજારમાં જબરદસ્ત પ્રદર્શન કરી રહી છે.

બિઝનેસ ટુડેના એક અહેવાલમાં દાવો કરવામાં આવ્યો છે કે અનલિસ્ટેડ માર્કેટમાં ચેન્નાઈ સુપર કિંગ્સના શેર શાનદાર પ્રદર્શન કરી રહ્યા છે. છેલ્લા 5 વર્ષમાં અનલિસ્ટેડ માર્કેટમાં CSKના શેરની કિંમત 15 ગણી વધી છે.

અનલિસ્ટેડ માર્કેટ એ બજાર છે જ્યાં IPO પહેલા શેરની ખરીદી અને વેચાણ કરવામાં આવે છે. રિપોર્ટ અનુસાર, અનલિસ્ટેડ માર્કેટમાં ચેન્નાઈ સુપરકિંગ્સના પ્રી-આઈપીઓ શેરની કિંમત હાલમાં રૂ. 160-165 પર ચાલી રહી છે.

નવેમ્બર 2018માં પેરેન્ટ કંપની ઈન્ડિયા સિમેન્ટ્સમાંથી ચેન્નાઈ સુપર કિંગ્સના શેર ડિમર્જ કરવામાં આવ્યા હતા. ત્યારબાદ ઈન્ડિયા સિમેન્ટના શેરધારકોને દરેક શેર માટે CSKનો એક શેર મળ્યો.

તે સમયે ચેન્નાઈ સુપરકિંગ્સના એક શેરની કિંમત 12 થી 15 રૂપિયા હતી જે હવે 160-165 રૂપિયા થઈ ગઈ છે. આ રીતે પાંચ વર્ષમાં તેની કિંમત લગભગ 15 ગણી વધી છે.

ઈન્ડિયા સિમેન્ટે વર્ષ 2008માં ચેન્નાઈ સુપર કિંગ્સ ફ્રેન્ચાઈઝીને રૂ. 371 કરોડમાં ખરીદી હતી. મહેન્દ્ર સિંહ ધોની શરૂઆતથી જ આ ટીમનો કેપ્ટન છે. તેને IPLની સૌથી સફળ ફ્રેન્ચાઇઝી માનવામાં આવે છે. આ ટીમ અત્યાર સુધીમાં 14 સીઝન રમી છે, જેમાં 10 વખત ફાઇનલમાં પહોંચી છે અને 5 વખત જીતી છે.

ચેન્નાઈ સુપર કિંગ્સે જાન્યુઆરી 2022માં એક અનોખી સિદ્ધિ મેળવી હતી. BCCI દ્વારા નવી IPL ફ્રેન્ચાઈઝીના વેચાણ સાથે, ચેન્નાઈ સુપર કિંગ્સનું મૂલ્ય પણ વધ્યું અને તે ભારતની પ્રથમ યુનિકોર્ન સ્પોર્ટ્સ એન્ટિટી બની.

અનલિસ્ટેડ માર્કેટના એક્સપર્ટ્સનું કહેવું છે કે ચેન્નાઈ સુપરકિંગ્સના શેરના ભાવમાં 50-60 ટકાનો વધારો થઈ શકે છે. આ રીતે, તેના શેરની કિંમત 240-250 રૂપિયાની રેન્જમાં પહોંચી શકે છે, જેના કારણે ફ્રેન્ચાઇઝીનું બજાર મૂલ્ય લગભગ 7,500 કરોડ રૂપિયા થઈ શકે છે.