બાયોડેટા તૈયાર રાખો! આ દિગ્ગજ ભારતીય કંપની આ વર્ષે 40000 લોકોની સીધી ભરતી કરશે

IT સેક્ટરમાં ચાલી રહેલી છટણીમાં આર્ટિફિશિયલ ઇન્ટેલિજન્સ (AI)એ પણ મહત્વની ભૂમિકા ભજવી છે. જો કે, દેશની સૌથી મોટી IT કંપનીએ આ વાતાવરણમાં પણ નોકરી શોધી રહેલા લોકોને મોટી રાહત આપી છે. કંપનીએ આ વર્ષે લગભગ 40 હજાર ફ્રેશર્સને નોકરી આપવાનું આયોજન કર્યું છે.

ટાટા કન્સલ્ટન્સી સર્વિસે માહિતી આપી છે કે તેણે જૂન ક્વાર્ટરમાં 5452 કર્મચારીઓ ઉમેર્યા છે. આ સાથે કંપનીના કુલ કર્મચારીઓની સંખ્યા વધીને 606,998 થઈ ગઈ છે. કંપની નાણાકીય વર્ષ 2024-25 ના અંત સુધી ફ્રેશર્સ ઉમેરવાનું ચાલુ રાખશે. TCS અનુસાર, આ નાણાકીય વર્ષના અંત સુધીમાં તેના કર્મચારીઓની કુલ સંખ્યા લગભગ 6.5 લાખ થઈ જશે.

TCSના ચીફ એચઆર ઓફિસર મિલિંગ લક્કડના જણાવ્યા અનુસાર, ભારત પ્રતિભાથી ભરપૂર છે. આ અમારી સૌથી મોટી તાકાત છે. ભવિષ્યમાં અમને આ પ્રતિભાનો ઘણો ફાયદો થવાનો છે. કૌશલ્ય વિકાસ કાર્યક્રમો ચલાવીને આને વધુ સુધારી શકાય છે. એટલા માટે અમે ફ્રેશર્સને મહત્તમ તકો આપવા માંગીએ છીએ.

તેમણે કહ્યું કે યુવાનોએ AIની અસરનો સામનો કરવા માટે તૈયાર રહેવું પડશે. ટેક્નોલોજીમાં બદલાવને કારણે જોબ માર્કેટમાં પણ બદલાવ આવ્યો છે. TCS આનો સામનો કરવા તૈયારી કરી રહી છે. અમારા કર્મચારીઓ હંમેશા ઉદ્યોગ અનુસાર પોતાને બદલવા માટે તૈયાર છે.

તેમણે કહ્યું કે જેઓ વધુ સારું પ્રદર્શન કરે છે તેમને કંપનીએ 10 થી 12 ટકાનો વધારો આપ્યો છે. આ સિવાય અન્ય લોકોને પણ 4.5 થી 7 ટકાનો વધારો આપવામાં આવ્યો છે. કંપનીએ 4 લાખથી વધુ કર્મચારીઓને AIની ટ્રેનિંગ આપી છે.

આ ઉપરાંત કર્મચારીઓએ કંપની દ્વારા ચલાવવામાં આવતા અન્ય તાલીમ કાર્યક્રમોનો પણ લાભ લીધો છે. ઉપરાંત, કંપનીના લગભગ 70 ટકા કર્મચારીઓ હવે ઓફિસમાંથી કામ કરી રહ્યા છે.