Photos: રસ્તાઓ, એરપોર્ટ અને સ્ટેશનો સમુદ્રમાં ફેરવાયા, તરતા વાહનો, તસવીરોમાં જુઓ મિચોંગની તબાહી

ચક્રવાતી તોફાન મિચોંગની અસરને કારણે સોમવારે ચેન્નાઈ અને તેની આસપાસના જિલ્લાઓમાં જનજીવન ખોરવાઈ ગયું હતું. અવિરત વરસાદને કારણે શહેરના વિવિધ ભાગોમાં પાણી ભરાઈ ગયા હતા, જેના કારણે 2015ના પૂરના પુનરાવર્તનની આશંકા ઊભી થઈ હતી.

વરસાદના કારણે લોકોને પીવાના પાણી અને અન્ય જરૂરી ચીજવસ્તુઓ માટે વલખા મારવા પડે છે. ભારે પવન સાથે મુશળધાર વરસાદને કારણે શહેરના અનેક વિસ્તારોમાં વીજળી ડૂલ થઈ ગઈ છે અને ઈન્ટરનેટ સેવા પણ ખોરવાઈ ગઈ છે.

ચક્રવાતી તોફાન 'મિગઝોમ' મંગળવારે સવારે આંધ્રપ્રદેશના દરિયાકાંઠે ત્રાટકે તેવી શક્યતા છે. ખરાબ હવામાનને કારણે ઘણી ટ્રેનો અને ફ્લાઈટ્સ રદ કરવામાં આવી હોવાથી પરિવહન સેવાઓને માઠી અસર થઈ હતી.

ચેન્નાઈ અને તેની આસપાસના કાંચીપુરમ, ચેંગલપેટ અને તિરુવલ્લુરના ઘણા ભાગો પૂરમાં ભરાઈ ગયા હતા અને રસ્તાઓ પરથી ઉભા પાણીને દૂર કરવા માટે સરકારી કર્મચારીઓને તૈનાત કરવામાં આવ્યા હતા.

ઈન્ડિયા મીટીરોલોજીકલ (IMD) વિભાગ દ્વારા જારી કરાયેલા અપડેટ મુજબ, 'ચક્રવાતી વાવાઝોડું મિગજોમ પશ્ચિમ મધ્ય અને અડીને આવેલા દક્ષિણ આંધ્રપ્રદેશ અને ઉત્તર તમિલનાડુના દરિયાકાંઠે દક્ષિણ-પશ્ચિમ બંગાળની ખાડી પર કેન્દ્રિત છે.

તે ઉત્તર તરફ લગભગ સમાંતર અને દક્ષિણ આંધ્રપ્રદેશના દરિયાકાંઠાની નજીક ખસીને નેલ્લોર અને માછલીપટ્ટનમના દરિયાકાંઠે તીવ્ર ચક્રવાતી તોફાન તરીકે ત્રાટક્યું છે

કેબિનેટ મંત્રી ઉધયનિધિ સ્ટાલિન અને માન. સુબ્રમણ્યમે ચેન્નાઈમાં અસરગ્રસ્ત વિસ્તારોની મુલાકાત લીધી હતી અને રાહત પ્રવૃત્તિઓનું નિરીક્ષણ કર્યું હતું.

એરપોર્ટ ઓથોરિટી ઓફ ઈન્ડિયાએ જણાવ્યું હતું કે સતત વરસાદને કારણે ચેન્નાઈ એરપોર્ટની કામગીરી સવારે 9:40 થી 11 વાગ્યા સુધી સ્થગિત કરી દેવામાં આવી છે અને એરપોર્ટ પર આવતી અને ત્યાંથી લગભગ 70 ફ્લાઈટ્સ રદ કરવામાં આવી છે.

મિગજોમ થોડા કલાકોમાં આંધ્રપ્રદેશના બાપટલા જિલ્લામાં પહોંચે તેવી શક્યતા હોવાથી, રાજ્યના દક્ષિણ કિનારે આવેલા ગામોના લગભગ 900 રહેવાસીઓને સાવચેતીના પગલા તરીકે સુરક્ષિત રીતે બહાર કાઢવામાં આવ્યા છે.

અમરાવતી હવામાન કેન્દ્રે જણાવ્યું હતું કે ગંભીર ચક્રવાતી વાવાઝોડાના કેન્દ્રની નજીકના વાવાઝોડાની વર્તમાન તીવ્રતા 90 - 100 કિલોમીટર પ્રતિ કલાક છે અને પવનની ગતિ 110 કિલોમીટર પ્રતિ કલાક સુધી છે.