મંગળ ગ્રહ પર કોણે બનાવ્યો સ્માઇલી ફેસ? યુરોપિયન સ્પેસ એજન્સીના સેટેલાઇટે ક્લિક કરી શાનદાર તસવીરો

Smiley Face On Mars: મંગળની સપાટી પર એક સ્માઇલી ફેસ જોવા મળ્યો છે, જે એવું લાગે છે કે જાણે મંગળની સપાટી પર કોઈએ તેને કોતર્યો હોય. મંગળની સપાટી પર એક હસતો ચહેરો જોવા મળ્યો છે, જેને જોઈને યુરોપિયન સ્પેસ એજન્સી (ESA)ના વૈજ્ઞાનિકો પણ આશ્ચર્યચકિત થઈ ગયા છે. ESAએ પણ આ શોધને દુનિયા સાથે શેર કરી છે. તમે વિચારતા હશો કે મંગળ પર સ્માઇલી ફેસ ક્યાંથી આવ્યો?

આ સ્માઇલી ફેસ કંઈ નહિ પણ મીઠાના ભંડાર છે…. હા! વૈજ્ઞાનિકો માને છે કે આ મંગળના પ્રાચીન જીવન સ્વરૂપોના અવશેષો છે. આ તસવીરને જોઈને એવું લાગે છે કે જાણે કોઈએ તેને સપાટી પર કોતર્યું હોય.

વૈજ્ઞાનિકો કહે છે કે આ મીઠાના ભંડારોમાં સંભવિત રીતે મંગળ ગ્રહના સરોવરો અને નદીઓમાંથી ઉદ્ભવતા કઠોર સૂક્ષ્મજીવો હોઈ શકે છે. વિજ્ઞાનીઓનું માનવું છે કે આ જીવો અબજો વર્ષો પહેલા તીવ્ર ઠંડીના કારણે ગાયબ થઈ ગયા હતા. યુરોપિયન સ્પેસ એજન્સીના ઉપગ્રહ ExoMars ટ્રેસ ગેસ ઓર્બિટરે કેપ્ચર કર્યું છે.

યુરોપિયન સ્પેસ એજન્સીનો આ ઉપગ્રહ મંગળ પર જીવનના સંકેતો શોધવામાં વ્યસ્ત છે. તેની શોધ દરમિયાન, સેટેલાઇટે તેના કેમેરા વડે ક્લોરાઇડ સોલ્ટ ડિપોઝિટની અદભૂત તસવીરો કેપ્ચર કરી હતી.

યુરોપિયન સ્પેસ એજન્સીના વૈજ્ઞાનિકોના જણાવ્યા અનુસાર, આ મીઠાના ભંડાર ભૂતકાળમાં પૃથ્વી પર અસ્તિત્વમાં રહેલી આબોહવા અને ભવિષ્યમાં આવનારા ફેરફારો વિશે માહિતી આપી શકે છે. વૈજ્ઞાનિકોનું આ સંશોધન સાયન્ટિફિક ડેટા જર્નલમાં પ્રકાશિત થયું હતું.

સ્વિટ્ઝર્લેન્ડની યુનિવર્સિટી ઓફ બર્નના વૈજ્ઞાનિક વેલેન્ટિન બિકી કહે છે કે મંગળ પર શીત યુગ શરૂ થયો જ્યારે ગ્રહે તેનું ચુંબકીય ક્ષેત્ર ગુમાવ્યું. તે પોતાનું વાતાવરણ જાળવી શક્યો નહીં. આ જ કારણ હતું કે મંગળનું પાણી બાષ્પીભવન થયું, થીજી ગયું અથવા સપાટીની અંદર ફસાઈ ગયું.

વિજ્ઞાનીઓનું કહેવું છે કે મંગળ પરથી પાણી અદૃશ્ય થતાંની સાથે જ સપાટી પર ખનિજોની છાપ પડવા લાગી. ખારું પાણી પણ ત્યાં જીવન માટે આશ્રયસ્થાન બની શકે છે કારણ કે મીઠાની ઊંચી સાંદ્રતા પાણીને માઈનસ 40 ડિગ્રી સેલ્સિયસથી નીચે સ્થિર થવા દેતી નથી.