વિશ્વભરમાં આ રોગે હાહાકાર મચાવ્યો, 34 દેશોમાં છે સૌથી વધુ જોખમ; WHOએ આપી ચેતવણી

Monkey Pox: આફ્રિકામાં એમ પોક્સ ઝડપથી ફેલાઈ રહ્યો છે. એમ પોક્સ એટલે કે મંકીપોક્સ અને આ વાયરસ વિશ્વ માટે જોખમ બની શકે છે. વર્લ્ડ હેલ્થ ઓર્ગેનાઈઝેશનના મહાનિર્દેશક ટેડ્રોસ અધનોમ ગેબ્રેયેસુસે આ અંગે નિયમન કટોકટી સમિતિની બેઠક રાખી છે.

મંકી પોક્સ શરૂઆતમાં ડેમોક્રેટિક રિપબ્લિક ઓફ કોંગોમાં શોધાયો હતો, પરંતુ હવે યુગાન્ડા અને કેન્યામાં પણ તેના દર્દીઓ જોવા મળી રહ્યા છે અને એવી આશંકા છે કે તે ખૂબ ઝડપથી ફેલાઈ રહ્યો છે અને જલ્દી જ રોગચાળાનું સ્વરૂપ લઈ શકે છે.

WHOના મહાનિર્દેશક ટેડ્રોસે જણાવ્યું કે વર્લ્ડ હેલ્થ ઓર્ગેનાઈઝેશન મંકી પોક્સ જેવું સંક્રમણ ન થાય તે માટે તેને રોકવા આફ્રિકાના રોગ નિયંત્રણ અને નિવારણ કેન્દ્રો સાથે મળીને કામ કરી રહ્યું છે.

ધ્યાન આપવા જેવી બાબત એ છે કે આફ્રિકા રોગ નિયંત્રણ અને નિવારણ કેન્દ્રએ જણાવ્યું કે આ મંકી પોક્સ આફ્રિકાના 34 દેશોમાં શોધાયો છે અને આ બધા દેશો ઉચ્ચ જોખમ પર છે.

આ વર્ષની શરૂઆતમાં આફ્રિકાના કોંગોમાં 14,000થી વધુ કેસ મંકી પોક્સના સામે આવ્યા હતા, જેમાં 511 મૃત્યુ થયા છે. ખાસ વાત એ પણ છે કે આ વર્ષે અત્યાર સુધીમાં સામે આવેલા કેસો, વર્ષ 2023ના કુલ આંકડાઓની બરાબર છે.

વર્લ્ડ હેલ્થ ઓર્ગેનાઈઝેશનના મંકીપોક્સ પર્યવેક્ષક રોઝામંડ લુઈસે જણાવ્યું કે તેમને ખબર નહોતી કે આ વધુ ચેપી છે અને ખૂબ ઝડપથી ફેલાઈ રહ્યું છે.

મંકી પોક્સ એક એવો વાયરસ છે, જેમાં ત્વચા પર પીડાદાયક ફોલ્લીઓ થઈ જાય છે. આમાં તાવ, માથાનો દુખાવો થાય છે અને શરીર તૂટવા લાગે છે. આ વાયરસ બે પ્રકારનો છે. પહેલો - ક્લેડ 1 (કોંગો બેસિન ક્લેડ) અને ક્લેડ 2 (પશ્ચિમ આફ્રિકન ક્લેડ). આ વાયરસ પ્રાણીઓથી માનવોમાં અને માનવોમાં એકબીજાના સંપર્કથી ફેલાય છે. જાતીય સંપર્ક પણ આ વાયરસના ફેલાવાનું એક કારણ છે. આ વાયરસ શરીરમાં બેથી ચાર અઠવાડિયા સુધી રહે છે.

મંકી પોક્સના લક્ષણો જલદી દેખાતા નથી. જો કોઈ વ્યક્તિ મંકી પોક્સથી સંક્રમિત હોય તો 1થી 2 અઠવાડિયા પછી જ તેને તેના લક્ષણો દેખાશે. આમાં તાવ, માથાનો દુખાવો, સ્નાયુઓમાં દુખાવો, શરીર પર ફોલ્લી નીકળવી, થાક અને પીઠનો દુખાવો સામેલ છે.

વર્લ્ડ હેલ્થ ઓર્ગેનાઈઝેશન અનુસાર મંકી પોક્સને કારણે ન્યૂમોનિયા, ઉલટી, ખોરાક ગળવામાં મુશ્કેલી, દૃષ્ટિમાં નબળાઈ થઈ શકે છે. HIVવાળા લોકોમાં જો મંકી પોક્સ શોધાય તો તેમના માટે જોખમ વધારે છે.

મંકી પોક્સથી બચવા માંગો છો તો આ માટે સંક્રમિત પ્રાણીઓ કે વ્યક્તિઓના સંપર્કમાં આવવાથી બચો. સ્વચ્છતાનું ધ્યાન રાખો. જે જગ્યાએ સંક્રમણ ફેલાયેલું હોય, તે જગ્યાએ સુરક્ષાત્મક કપડાં પહેરો. મંકી પોક્સના લક્ષણો દેખાય તો પ્રવાહી પદાર્થોનું સેવન જરૂર કરો.