બે વર્ષથી ATSના રડારમાં હતા આતંકી ભાઇઓ, એક ફેસબુક લાઇકના કારણે ઝડપાયા

રાજકોટઃ રાજકોટ પોલીસ દ્ધારા ડી ગેંગના ચાર શાર્પશૂટર્સને પકડ્યાના એક દિવસ બાદ ગુજરાત એટીએસે આતંકી સંગઠન ઇસ્લામિક સ્ટેટના ઇશારે બોમ્બ બ્લાસ્ટ કરવાની યોજના બનાવતા બે આતંકીઓને ઝડપ્યા હતા. ગુજરાત એટીએસના કહેવા પ્રમાણે, પકડાયેલા બંન્ને આતંકીઓની ઓળખ વસીમ રામોડીયા અને નઈમ રામોડીયા નામના બે ભાઇઓ તરીકે થઇ હતી.

પોલીસના કહેવા પ્રમાણે, વસીમ અને નઇમ આરીફ રામોડિયાના પુત્રો છે. રાજકોટમાં આરીફ રામોડિયા અત્યંત જાણીતું નામ છે. આરીફ રામોડિયા જાણીતા ક્રિકેટ અંપાયર છે અને ડિસ્ટ્રિક્ટ લેવલની ક્રિકેટ સ્પર્ધાઓમાં અંપાયરિંગ કરીને તેમણે ભારે આદર મેળવ્યો છે. ઉલ્લેખનીય છે કે આતંકી સંગઠન ઇસ્લામિક સ્ટેટ સીરિયા અને ઇરાકમાં રહી સમગ્ર વિશ્વમાં આતંક ફેલાવવાનું કામ કરે છે. તે વિશ્વમાં યુવકોની પોતાના સંગઠનમાં ભરતી કરી હુમલાઓ માટે ઉશ્કેરે છે.

બાદમાં ગુજરાત એટીએસ 2015થી લઇને અત્યાર સુધી આઇએસના ફેસબુક પેજને કોણે કોણે લાઇક કર્યું છે તે સહિતની વિગતો એકઠી કરી હતી. ઉપરાંત પેજને લાઇક કરનારા લોકોના ફોનનંબરથી લઇને તેમના એડ્રેસ સુધીની વિગતો પણ ગુપ્ત રીતે એકઠી કરવામાં આવી રહી હતી. બાદમાં બે વર્ષ સુધી બંન્ને ભાઇઓ પર વોચ રાખ્યા બાદ અંતે તેમને ઝડપી પાડવામાં આવ્યા હતા.

ગુજરાત એટીએસના કહેવા પ્રમાણે,તેઓ છેલ્લા દોઢ-બે વર્ષથી બંન્ને ભાઇઓ પર વોચ રાખી હતી. એટીએસના કહેવા મુજબ થોડા સમય અગાઉ જ આતંકી સંગઠન ઇસ્લામિક સ્ટેટના ફેસબુક પેજ પર બંન્ને ભાઇઓએ લાઇક કર્યા બાદ તેઓ પોલીસની રડારમાં આવ્યા હતા.