ઓસ્ટ્રેલિયન બેટ્સમેને એક ઈનિંગ્સમાં 40 સિક્સર ફટકારી

આંતરરાષ્ટ્રીય ક્રિકેટમાં પોતાની ટીમના કુલ સ્કોરનો સર્વાધિક રન બનાવવા રેકોર્ડ વિવિયન રિચર્ડસનના નામે છે. 1984માં ઈંગ્લેન્ડ વિરુદ્ધ ઓલ્ડ ટ્રેફર્ડમાં વેસ્ટઈન્ડીઝે કુલ 9 વિકેટ પર 272 રનમાંથી 189 રન એકલા રિચર્ડસને બનાવ્યા હતા. રિચર્ડસન વેસ્ટ ઈન્ડીઝની ટીમનો કુલ સ્કોર 69.48 ટકા રન બનાવ્યા હતા.

ઓસ્ટ્રેલિયાની ક્લબ ક્રિકેટ ટીમના બેટ્સમેનને રન દોડવાનો કંટાળો આવતો હતો તેથી તેણે એવી તોફાની બેટિંગ કરી કે તેણે વેસ્ટ ઈન્ડિઝના મહાન ક્રિકેટર વિવિયન રિચાર્ડ્સના 33 વર્ષ જૂના રેકોર્ડને તોડી નાંખ્યો હતો. સાઉથ ઓસ્ટ્રેલિયાની વેસ્ટ ઓગસ્ટા ગ્રેડ બી માટે રમી રહેલા જોશ ડનસ્ટને સેન્ટ્રલ સ્ટર્લિંગ સામે 35 35 ઓવરની મેચમાં 307 રનની ઈનિંગ્સ રમી હતી. જેમાં તેણે 40 સિક્સર અને નવ બાઉન્ડ્રી ફટકારી હતી. જોકે, રસપ્રદ વાત એ રહી હતી કે તેની ટીમનો સ્કોર 354 રન જ હતો. આમ ટીમના સ્કોરમાં તેનું યોગદાન 86 ટકા રહ્યું હતું.

ડનસ્ટનની ટીમના પાંચ ખેલાડી ખાતું પણ ખોલાવી શક્યા ન હતા. ડનસ્ટન બાદ બીજો સર્વોચ્ચ વ્યક્તિગત સ્કોર અણનમ 18 રનનો રહ્યો હતો જે બેન રસેલે નોંધાવ્યા હતા. ડનસ્ટને સાતમી વિકેટ માટે રસેલ સાથે 203 રનની ભાગીદારી નોંધાવી હતી જેમાં રસેલનું યોગદાન ફક્ત પાંચ રનનું રહ્યું હતું.

ડનસ્ટને કહ્યું હતું કે મેચની આગલી રાત્રે મેં મારા સાથી ખેલાડીઓ સાથે બીયર પીધી હતી. હું મેદાનમાં આવ્યો ત્યારે મારા મનમાં બોલને ફટકારવાનો જ વિચાર ચાલતો હતો. જોકે મેં નક્કી કર્યું હતું કે હું આઉટ થઈશ નહીં. હું દોડીને રન લેવા ઈચ્છતો ન હતો તેથી મેં સિક્સર ફટકારવાનું નક્કી કર્યું હતું.