IPL-11: બ્રાવોની આક્રમક બેટિંગે પલટી બાજી, ચેન્નઈ સુપરકિંગ્સનો 1 વિકેટથી વિજય

મુંબઈ તરફથી સુર્યાકુમાર યાદવે 43 અને વિકેટકિપર ઈશાન કિશાને 40 રન બનાવ્યા હતા. રોહિત શર્મા 15 રન પર કેચ આઉટ થઈ ગયો હતો.

કૃણાલ પંડ્યાના 22 બોલના 42 રનની મદદથી મુંબઈ ઈન્ડિયન્સે ચાર વિકેટે 165 રન બનાવ્યા હતા. તેના જવાબમા સુપરકિંગ્સે 15મી ઓવરમાં 105 રન પર સાત વિકેટ ગુમાવી દીધી હતી. પરંતુ બ્રાવોએ 30 બોલમાં ત્રણ ચોગ્ગા અને સાત છગ્ગા સાથે 68 રન બનાવી મેચની બાજી પલટી નાખી હતી. અને મુંબઈ ઈન્ડિયન્સની હાથમાંથી મેચ છીનવી લીધી હતી.

બે વર્ષ બાદ આઈપીએલમાં વાપસી કરનારી ધોનીની ચેન્નઈ સુપરકિંગ્સની ટીમે અંતિમ ત્રણ ઓવરમાં 47 રનની જરૂર હતી. બ્રાવોએ 18મીં ઓવરમાં મેચની બાજી પલટાવતા નાથન મેક્લીનાગનને બે છગ્ગા અને એક ચોગ્ગો ફટકારી દીધો હતો. તેની આગલી ઓવરમાં જસપ્રીત બુમરાહને ત્રણ છગ્ગા ફટકાર્યા હતા પરંતુ ઓવરના છેલ્લા બોલ પર કેપ્ટન રોહિત શર્માને આપી બેઠો હતો.

અંતિમ ઓવર આક્રમક રહી હતી. ચેન્નઈને જીત માટે અંતિમ ઓવરમાં સાત રનની જરૂર હતી ત્યારે મુસ્તાફિજૂર રહેમાનની પ્રથમ ત્રણ બોલ ખાલી ગયા બાદ જાદવે ચોથા બોલ પર છગ્ગો ફટકારી દીધો અને પાંચમાં બોલ પર ચોગ્ગો તેની સાથે જીત હાંસલ કરી લીધી.

PL-2018ની પહેલી મેચમાં જ બે વર્ષ બાદ પુનરાગમન કરી રહેલી CSK ટીમના કેપ્ટન મહેન્દ્રસિંહ ધોનીએ ટોસ જીત્યો હતો અને પહેલા ફિલ્ડીંગનો નિર્ણય લીધો હતો. મુંબઈ ઈન્ડિયન્સે ચેન્નઈને 166 રનનો ટાર્ગેટ આપ્યો હતો. ચેન્નઈની શરૂઆત ખૂબજ ખરાબ રહી હતી. પરંતુ બ્રાવોની તોફાની બેટિંગના સહારે એક વિકેટથી જીત મેળવી લીધી છે.

આઈપીએલ 11ની પ્રથમ મેચમાં ચેન્નઈ સુપર કિંગ્સના ખેલાડી ડ્વેન બ્રાવોએ પોતાની તોફાની બેટિંગથી મુંબઈ ઈન્ડિયન્સની હાથમાંથી જીત છીનવી લીધી હતી. આ મેચમાં બ્રાવોએ 30 બોલમાં 68 રનની તુફાની ઈનિંગ્સ રમી હતી.

બ્રાવોની આ શાનદાર બેટિંગથી ધોનીની ટીમે મુંબઈ ઈન્ડિયન્સને એક વિકેટથી હરાવી અને આઈપીએલ સીઝન 11માં જીત સાથે પોતાની શરૂઆત કરી દીધી છે. બ્રાવોએ 54 રન સાત છગ્ગા અને ત્રણ ચોગ્ગાથી બનાવ્યા હતા.