Pakistan Cricket Board : એશિયા કપને લઈને પાકિસ્તાન હજી પણ અવળચંડાઈ કરવામાંથી ઉંચુ નથી આવતુ. એશિયા કપને લઈને જે વિવાદ ચાલી રહ્યો છે દર વખતની જેમ ફરી એકવાર પાકિસ્તાન જ તેના માટે કારણભૂત છે. ઘણા મહિનાઓના સંઘર્ષ બાદ આખરે ગયા મહિને ટૂર્નામેન્ટના આયોજન માટે સમજૂતી થઈ હતી, પરંતુ હવે પાકિસ્તાન ક્રિકેટ બોર્ડ ફરીથી તેને અધવચ્ચે જ અટકાવવાનો પ્રયાસ કરી રહ્યું છે અને આ માટે તેણે વચનો તોડવાનું પણ શરૂ કરી દીધું છે.
મળતા અહેવાલો અનુસાર, પીસીબીના નવા બોસ હવે એશિયા કપમાં ફરી એકવાર ફેરવી તોલી રહ્યું છે અને નવી જ માંગણી મુકવા લાગ્યું છે.
ઓગસ્ટ-સપ્ટેમ્બરમાં યોજાનાર એશિયા કપનું આયોજન આ વખતે હાઇબ્રિડ મોડલ પર કરવામાં આવી રહ્યું છે. પાકિસ્તાની બોર્ડના પૂર્વ અધ્યક્ષ નજમ સેઠીના પ્રસ્તાવ પછી જ એશિયન ક્રિકેટ કાઉન્સિલ દ્વારા તેનો સ્વીકાર કરવામાં આવ્યો હતો. આ અંતર્ગત 6 ટીમોની ટૂર્નામેન્ટની પ્રથમ 4 મેચ પાકિસ્તાનમાં અને ફાઈનલ સહિત બાકીની 9 મેચો શ્રીલંકામાં રમાશે. આ ટુર્નામેન્ટ 31 ઓગસ્ટથી 13 સપ્ટેમ્બર સુધી રમાવવાની છે.
ACCની બેઠકમાં PCB આડખીલી
એશિયા કપનું શેડ્યૂલ હજુ જાહેર કરવામાં આવ્યું નથી. 16 જુલાઈ, રવિવારના રોજ મળનારી ACCની બેઠકમાં તેને મંજૂરી આપવામાં આવે તેવી શક્યતા છે. પરંતુ પાકિસ્તાની બોર્ડ આ બેઠકને રોકવાના મૂડમાં છે. સમાચાર એજન્સી પીટીઆઈના અહેવાલ મુજબ, પાકિસ્તાન બોર્ડના નવા વડા ઝકા અશરફ આ બેઠકમાં આ મુદ્દો ઉઠાવશે. રિપોર્ટમાં કહેવામાં આવ્યું છે કે, અશરફે આ અઠવાડિયે ડરબનમાં આયોજિત ICC કોન્ફરન્સમાં ACC સભ્ય દેશોને આ માંગનો સંકેત આપ્યો હતો.
શ્રીલંકાની પીઠમાં ખંજર ભોંકવાની ફિરાકમાં
રિપોર્ટમાં પાકિસ્તાની બોર્ડના સૂત્રોને ટાંકીને કહેવામાં આવ્યું છે કે, પીસીબી 4થી વધુ મેચો ઈચ્છે છે. શ્રીલંકામાં ચોમાસાની સ્થિતિને કારણે આ માટે એક દલીલ આપવામાં આવી રહી છે. આ મુજબ, શ્રીલંકામાં વરસાદની સ્થિતિને ધ્યાનમાં રાખીને મેચો પ્રભાવિત થવાની સંભાવના છે. આમ થવાની સ્થિતિમાં પીસીબી પાકિસ્તાનને કેટલીક વધુ મેચો આપવાની માંગ કરવા જઈ રહ્યું છે.
જોકે હવે પીસીબી ગમે તેટલો પ્રયાસ કરે પરંતુ તેની માંગ પૂરી થવાની શક્યતા ખુબ જ નહિવત છે. તેનું કારણ એક સાથે બે જગ્યાએ ટુર્નામેન્ટ યોજવામાં પડતી મુશ્કેલીઓ અને એક દેશથી બીજા દેશમાં જતી ટીમોની સમસ્યાઓ છે. એટલે કે એકંદરે ઝકા અશરફને નિરાશ જ હાથ લાગે તેવી શક્યતા ખુબ જ વધારે છે.