અમદાવાદ IPL ટીમના નામને લઈ સૌથી મોટા સમાચાર સામે આવ્યા છે. સૌથી પહેલા અલગ-અલગ નામ અંગે અટકળો ચાલી રહી હતી, જેમાં રિપોર્ટ્સ અનુસાર અમદાવાદ ટીમનું નામ પહેલા 'અમદાવાદ ટાઈટન્સ' રાખવામાં આવ્યું હતું. પરંતુ હવે સમગ્ર ગુજરાતને આવરી લેતા આ અમદાવાદ ટાઈટન્સ નામ બદલવામાં આવ્યું છે. હવે ટીમનું નામ 'ગુજરાત ટાઈટન્સ' રાખવામાં આવ્યું છે. ગુજરાત ટાઈટન્સે સોશિયલ મીડિયા પર અકાઉન્ટ પણ બનાવી દીધું છે.
અમદાવાદે પોતાની ટીમના કેપ્ટન તરીકે હાર્દિક પંડ્યાને પસંદ કર્યો છે, જ્યારે શુભમન ગિલ અને રાશિદ ખાન પણ ટીમના ખાસ ખેલાડી રહેશે. વળી, કોચિંગ સ્ટાફની વાત કરીએ તો આશિષ નેહરા અને ગેરી કસ્ટર્નને પણ આ ટીમમાં સામેલ કરાયા છે.
અગાઉ 'અમદાવાદ ટાઈટન્સ' તરીકે ઓળખાશે એવી માહિતી મળી હતી. ઘણા ફેન્સ ટીમનું નામ બદલવા કહી રહ્યા હતા. એવામાં ફ્રેન્ચાઈઝીએ ગુજરાતની જનતાને આવરી લેતા 'ગુજરાત ટાઈટન્સ' નામ જાહેર કર્યું છે.
2 કરોડની કેટેગરીમાં કેટલા ક્રિકેટર ?
IPL 2022ની મેગા ઓક્શનમાં જે 590 ખેલાડીઓની બોલી લગાવવામાં આવશે.જેમાં કુલ 370 ભારતીય અને 220 વિદેશી ખેલાડીઓ હશે. રૂ. 2 કરોડ સૌથી વધુ અનામત કિંમત છે અને 48 ખેલાડીઓએ આ કેટેગરીમાં પોતાને સ્થાન આપવાનું પસંદ કર્યું છે. તેમાંથી 228 કેપ્ડ છે અને 355 અનકેપ્ડ છે. કેપ્ડ એટલે કે તેઓ ભારત અથવા અન્ય કોઈ દેશ માટે આંતરરાષ્ટ્રીય ક્રિકેટ રમ્યા છે. અનકેપ્ડ ખેલાડીઓનો અર્થ એ છે કે તેઓ ભારત અથવા અન્ય કોઈ દેશમાં સ્થાનિક ક્રિકેટ અથવા લીગ ક્રિકેટ રમ્યા છે, પરંતુ તેમને આંતરરાષ્ટ્રીય ક્રિકેટ રમવાની તક મળી નથી. એસોસિયેટ નેશન્સમાંથી 7 ખેલાડીઓ પણ છે, જેમની મેગા ઓક્શનમાં બોલી લગાવવામાં આવનાર છે.
આ વિદેશી ખેલાડીઓને લાગી શકે છે જેકપોટ
વિદેશી ખેલાડીઓમાં ફાફ ડુ પ્લેસિસ, ડેવિડ વોર્નર, પેટ કમિન્સ, કાગિસો રબાડા, ટ્રેન્ટ બોલ્ટ, ક્વિન્ટન ડી કોક, જોની બેરસ્ટો, જેસન હોલ્ડર, ડ્વેન બ્રાવો, શાકિબ અલ હસન અને વાનિન્દુ હસરંગા જેવા મજબૂત ખેલાડીઓ છે.
કયા દેશના કેટલા ખેલાડીઓ હરાજીમાં લેશે ભાગ
અફઘાનિસ્તાનના 17,ઓસ્ટ્રેલિયાના 47, બાંગ્લાદેશના 5, ઈંગ્લેન્ડના 24, આયર્લેન્ડના 5, ન્યૂઝીલેન્ડના 24, સાઉથ આફ્રિકાના 33, શ્રીલંકાના 23, વેસ્ટ ઈન્ડિઝના 34, ઝીમ્બાબ્વેના એક, નામીબિયાના ત્રણ, નેપાળના એક, સ્કોટલેન્ડના એક અને યુએસએના એક ખેલાડી હરાજીમાં ભાગ લેશે.