ODI WC Final 2023: આજે વનડે વર્લ્ડકપ 2023ની ફાઇનલ મેચ રમાશે, આ મેચમાં ભારતીય ટીમની ટક્કર ઓસ્ટ્રેલિયા સામે થઇ રહી છે. આ શાનદાર મેચ અમદાવાદના નરેન્દ્ર મોદી સ્ટેડિયમમાં રમાશે. ખાસ વાત છે કે, આ પહેલા વનડે વર્લ્ડકપ 2003ની ફાઈનલ મેચ બંને ટીમો વચ્ચે રમાઈ હતી, જેમાં ઓસ્ટ્રેલિયા જીત્યું હતું. વર્તમાન વર્લ્ડકપમાં ભારત અને ઓસ્ટ્રેલિયા બંને ટીમોએ શાનદાર પ્રદર્શન કરીને ફાઇનલમાં જગ્યા બનાવી છે. વિરાટ કોહલી ફાઈનલ મેચ દરમિયાન મેદાનમાં ઉતરતાની સાથે જ એક મોટો રેકોર્ડ બનાવી લેશે.
આ ખાસ ક્લબમાં સામેલ થશે વિરાટ કોહલી
વનડે વર્લ્ડકપના ઈતિહાસમાં ભારત અત્યાર સુધી ત્રણ ફાઈનલ રમ્યું છે, જેમાંથી ભારતે 1983માં કપિલ દેવની કેપ્ટનશીપમાં અને 2011માં મહેન્દ્ર સિંહ ધોનીની કેપ્ટનશીપમાં ટ્રૉફી જીતી છે. વનડે વર્લ્ડકપમાં વિરાટ કોહલીની આ બીજી ફાઇનલ મેચ હશે. આ પહેલા તેણે વર્લ્ડકપ 2011ની ફાઈનલ મેચ રમી હતી. આ સાથે તે વર્લ્ડકપમાં બે ફાઇનલ મેચ રમનાર ભારતનો છઠ્ઠો ખેલાડી બની જશે. તેના પહેલા સચિન તેંદુલકર, વિરેન્દ્ર સેહવાગ, યુવરાજ સિંહ, ઝહીર ખાન અને હરભજન સિંહ વર્લ્ડકપમાં 2 ફાઈનલ મેચ રમી ચૂક્યા છે.
શાનદાર ફોર્મમાં છે વિરાટ કોહલી
ભારતીય ટીમનો સ્ટાર ખેલાડી વિરાટ કોહલી શાનદાર ફોર્મમાં છે. તે ODI વર્લ્ડકપમાં ટીમ ઈન્ડિયા માટે સૌથી મોટા મેચ વિનર તરીકે ઉભરી આવ્યો છે. આ સિઝનમાં ત્રણ સદી ફટકારી છે. તેણે ન્યૂઝીલેન્ડ સામે સેમિ ફાઇનલમાં 117 રનની ઇનિંગ રમી હતી. આ તેની ODI ક્રિકેટમાં 50મી સદી હતી. આ સાથે તે ODI વર્લ્ડકપ 2023માં સૌથી વધુ રન બનાવનાર બેટ્સમેન બની ગયો છે. તેણે અત્યાર સુધીમાં 711 રન બનાવ્યા છે.
ભારતીય ટીમે ગ્રુપ સ્ટેજમાં સતત 9 મેચ જીતીને સેમિ ફાઈનલમાં જગ્યા બનાવી હતી. આ પછી ટીમ ઈન્ડિયાએ સેમિ ફાઈનલમાં ન્યૂઝીલેન્ડને 70 રનથી હરાવ્યું હતું. રોહિત શર્માની કેપ્ટનશીપમાં ટીમ ઈન્ડિયા ખૂબ સારું પ્રદર્શન કરી રહી છે. બીજીબાજુ ઓસ્ટ્રેલિયાની ટીમને પ્રથમ બે મેચમાં હારનો સામનો કરવો પડ્યો હતો, પરંતુ ત્યાર બાદ ઓસ્ટ્રેલિયાએ સતત મેચ જીતીને ફાઇનલમાં જગ્યા બનાવી લીધી છે. બંને ટીમો પાસે સ્ટાર ખેલાડીઓની ફોજ છે, જે થોડા જ બોલમાં મેચનો માર્ગ બદલી શકે છે.