icc loan west indies: ક્રિકેટ જગતમાં અત્યારે વેસ્ટ ઈન્ડિઝ ક્રિકેટ બોર્ડ મોટા આર્થિક સંકટમાંથી પસાર થઈ રહ્યું છે. આ કપરા સમયમાં આંતરરાષ્ટ્રીય ક્રિકેટ કાઉન્સિલ (ICC) તેમની વહારે આવી છે. તાજેતરમાં જ સ્કોટલેન્ડના એડિનબર્ગ ખાતે ICC ના અધ્યક્ષ જય શાહની આગેવાનીમાં યોજાયેલી વાર્ષિક સામાન્ય સભા (AGM) માં વેસ્ટ ઈન્ડિઝ ક્રિકેટને ફરી બેઠું કરવા માટે એક મહત્વનો નિર્ણય લેવામાં આવ્યો છે. આ બેઠકમાં બોર્ડને મદદરૂપ થવા માટે 12.82 મિલિયન યુએસ ડોલર (જે ભારતીય ચલણ મુજબ લગભગ 123 કરોડ રૂપિયા થાય છે) ની જંગી લોન મંજૂર કરવામાં આવી છે.
આ મોટી નાણાકીય સહાયથી કંગાળ થઈ રહેલા બોર્ડને ઘણો મોટો ટેકો મળશે. છેલ્લા કેટલાક સમયથી વેસ્ટ ઈન્ડિઝ ક્રિકેટ બોર્ડ સતત ઘટતી આવક, રોકડ અનામતમાં થઈ રહેલા ઘટાડા અને વર્ષ 2026 માં થનારા સંભવિત મોટા નુકસાનની ચિંતા સાથે ઝઝૂમી રહ્યું છે. આ પરિસ્થિતિને જોતા ICC એ લોન આપતી વખતે સ્પષ્ટ કર્યું હતું કે આ રકમનો મુખ્ય હેતુ પોતાના "સભ્ય બોર્ડને પડકારજનક સમયમાં સપોર્ટ કરવાનો" છે.
લોનની શરતો અંગે કોઈ ખુલાસો નહીં
જોકે, આ મામલે એક વાત ખાસ નોંધવા જેવી છે કે ICC એ લોન ચૂકવવાનો સમયગાળો, તેના પર લાગતો વ્યાજ દર, સિક્યુરિટી વ્યવસ્થા કે અન્ય કોઈ શરતો વિશે સત્તાવાર રીતે કોઈ ખુલાસો કર્યો નથી. હવે એ જોવું ખરેખર રસપ્રદ રહેશે કે વેસ્ટ ઈન્ડિઝ ક્રિકેટ બોર્ડ આ ફંડનો ઉપયોગ પોતાના ક્રિકેટના સ્તરને સુધારવા માટે કેવી રીતે કરે છે. અત્રે ઉલ્લેખનીય છે કે, વેસ્ટ ઈન્ડિઝ બોર્ડ માટે આ સ્થિતિ નવી નથી; બોર્ડને આ પહેલા પણ આવી નાણાકીય મદદ ઘણી વખત મળી ચૂકી છે.
આ પણ વાંચોઃ હવે ચેમ્પિયન બનવું અઘરું! ICC એ 2027 ODI અને 2028 T20 વર્લ્ડ કપ ફોર્મેટ બદલ્યા
પડકારજનક સમયમાંથી પસાર થઈ રહ્યું છે બોર્ડ
હાલમાં વેસ્ટ ઈન્ડિઝ ક્રિકેટની આર્થિક સ્થિતિ કેટલી ખરાબ છે, તેનો અંદાજ તેમના તાજેતરના ખાતાકીય આંકડાઓ પરથી જ લગાવી શકાય છે. 30 સપ્ટેમ્બર, 2025 ના રોજ પૂરા થતા વર્ષ માટે બોર્ડના ઓડિટેડ રિપોર્ટમાં 28.14 મિલિયન યુએસ ડોલર (આશરે 270 કરોડ રૂપિયા) નું મોટું નુકસાન દર્શાવવામાં આવ્યું છે. જ્યારે તેની સામે પાછલા નાણાકીય વર્ષમાં બોર્ડે 23.12 મિલિયન યુએસ ડોલર (આશરે 222 કરોડ રૂપિયા) નો નફો કર્યો હતો.
બોર્ડની આવક અને જાવકના આંકડાઓ પણ ચિંતાજનક છે. બોર્ડની કુલ આવક વર્ષ 2024 માં 88.35 મિલિયન યુએસ ડોલર (આશરે 850 કરોડ રૂપિયા) હતી, જે 2025 માં 53 ટકાના ભારે ઘટાડા સાથે માત્ર 40.89 મિલિયન યુએસ ડોલર (આશરે 393 કરોડ રૂપિયા) થઈ જવાનો અંદાજ છે. બીજી તરફ, ટીમ પ્રવાસ અને ટુર્નામેન્ટના ખર્ચાઓ ઘટવાના બદલે 36.85 મિલિયન યુએસ ડોલર (આશરે 354 કરોડ રૂપિયા) થી વધીને 41.59 મિલિયન યુએસ ડોલર (આશરે 400 કરોડ રૂપિયા) થઈ ગયા છે, જે બોર્ડની નાણાકીય મુશ્કેલીઓમાં સતત વધારો કરી રહ્યા છે.
આ પણ વાંચોઃ શું બીજી વનડેમાં રોહિત-કોહલી નહીં રમે? કેપ્ટન શુભમન ગિલે કહ્યું - ‘અમે અલગ-અલગ કોમ્બિનેશન....’