IND vs ZIM 3rd T20 Playing 11: ભારતીય ક્રિકેટ ટીમે ઝિમ્બાબ્વેને બીજી T20 મેચમાં 90 રનથી કચડી નાખીને શ્રેણી પર પહેલાથી જ કબજો જમાવી લીધો છે. હવે બંને ટીમો વચ્ચે 26 જુલાઈએ હરારેના મેદાન પર ત્રીજી અને અંતિમ T20 મેચ રમાવા જઈ રહી છે. સિરીઝ જીતી લીધા બાદ એવી પૂરી શક્યતા છે કે અંતિમ મેચમાં ભારતીય ટીમની પ્લેઈંગ ઈલેવનમાં કેટલાક મોટા ફેરફારો જોવા મળશે. આ અંગે જ્યારે કેપ્ટન શ્રેયસ ઐયરને પૂછવામાં આવ્યું, ત્યારે તેમણે ટીમમાં ફેરફારને લઈને મહત્વની વિગતો અને સંકેતો શેર કર્યા છે.
બીજી મેચમાં એક જ ફેરફાર, ડેબ્યૂમાં ચમક્યો યશ ઠાકુર
તમને જણાવી દઈએ કે, હરારેમાં રમાયેલી બીજી T20 મેચમાં ટીમ ઈન્ડિયાએ પોતાની પ્લેઈંગ ઈલેવનમાં માત્ર એક જ ફેરફાર કર્યો હતો. ફાસ્ટ બોલર અશોક શર્માની જગ્યાએ યુવા ખેલાડી યશ ઠાકુરને ડેબ્યૂ કરવાની તક આપવામાં આવી હતી. યશે પણ આ શાનદાર તકનો પૂરેપૂરો ફાયદો ઉઠાવ્યો અને પોતાની પહેલી જ મેચમાં 2 મહત્વની વિકેટ ઝડપીને પોતાને સાબિત કરી દીધો.
ત્રીજી મેચમાં પ્લેઈંગ ઈલેવન વિશે શ્રેયસ ઐયરે શું કહ્યું?
હવે જ્યારે 26 જુલાઈએ ત્રીજી T20 રમાવાની છે અને સિરીઝ ભારતના નામે થઈ ચૂકી છે, ત્યારે ટીમમાં યુવા ખેલાડીઓને તક આપવા માટે ફેરફાર થવા લગભગ નક્કી છે. બીજી મેચ બાદ જ્યારે કેપ્ટન શ્રેયસ ઐયરને પૂછવામાં આવ્યું કે અંતિમ મેચમાં ટીમ ઈન્ડિયા કયા ફેરફારો કરી શકે છે? ત્યારે ઐયરે જવાબ આપતા કહ્યું કે, "અમે હજુ સુધી આ અંગે કોઈ અંતિમ નિર્ણય લીધો નથી અને કોચ સાથે પણ વાતચીત કરી નથી. પરંતુ દુર્ભાગ્યવશ, પ્રિન્સ યાદવ ઈજાગ્રસ્ત થયો છે, તેથી શક્ય છે કે ટીમમાં કેટલાક ફેરફારો થઈ શકે છે."
આ પણ વાંચોઃ IND vs ZIM 2nd T20 Highlights: 2026 માં ભારતનો ત્રીજો સૌથી મોટો વિજય, જુઓ મેચની હાઇલાઇટ્સ
પ્રિન્સ યાદવની ઈજા અને અશોક શર્માની વાપસીની શક્યતા
ઉલ્લેખનીય છે કે, બીજી T20 મેચ દરમિયાન ફાસ્ટ બોલર પ્રિન્સ યાદવને હેમસ્ટ્રિંગની ઈજા સતાવી રહી હતી. આ ઈજાના કારણે તે આખી મેચમાં માત્ર 1.2 ઓવર જ બોલિંગ કરી શક્યો હતો. જોકે, કમાલની વાત એ રહી કે તેણે ફેંકેલા માત્ર 8 બોલમાં જ 2 વિકેટ પોતાના નામે કરી લીધી હતી. હવે જો પ્રિન્સ ત્રીજી મેચ માટે અનફિટ સાબિત થશે, તો સિરીઝની પહેલી T20 માં આંતરરાષ્ટ્રીય ક્રિકેટમાં પદાર્પણ કરનાર અશોક શર્મા ફરી એકવાર પ્લેઈંગ ઈલેવનમાં પાછો ફરી શકે છે.
બીજી T20 માં બેટ્સમેનો અને બોલરોનો કમાલ
બીજી T20 મેચના પ્રદર્શન પર નજર કરીએ તો, ભારતીય બેટ્સમેનોએ કમાલની બેટિંગ કરી હતી. યુવા સ્ટાર તિલક વર્મા (60 રન) અને ઈશાન કિશન (81 રન) ની તોફાની અડધી સદીની મદદથી ભારતે ઝિમ્બાબ્વે સામે 219 રનનો વિશાળ અને મજબૂત સ્કોર ખડકી દીધો હતો. ત્યારબાદ ભારતીય બોલરોએ પણ પોતાની ધારદાર બોલિંગનો પરચો બતાવ્યો અને ઝિમ્બાબ્વેની આખી ટીમને માત્ર 129 રનમાં જ સમેટી લીધી હતી.
આ પણ વાંચોઃ ટીમ ઈન્ડિયાને મોટો ઝટકો! WI સામેની ODI શ્રેણીમાંથી બુમરાહ-ઐયર સહિત 8 સ્ટાર્સ આઉટ