india vs england odi: ભારત અને ઇંગ્લેન્ડ વચ્ચે ચાલી રહેલી 3 મેચની વનડે સિરીઝમાં અત્યારે ટીમ ઇન્ડિયા શાનદાર ફોર્મમાં છે અને સિરીઝમાં 1-0 થી આગળ છે. હવે બંને ટીમો વચ્ચે આવતીકાલે એટલે કે ગુરુવાર, 16 જુલાઈના રોજ 2જી વનડે મેચ રમાવા જઈ રહી છે. જો તમે પણ ક્રિકેટના આશિક છો, તો તમારે આ મેચ જોવા માટે મોડે સુધી જાગવાની તૈયારી રાખવી પડશે, કારણ કે 1લી મેચની સરખામણીમાં આ 2જી વનડે મેચના સમયમાં બોર્ડ દ્વારા મોટો ફેરફાર કરવામાં આવ્યો છે.
તમને જણાવી દઈએ કે એજબેસ્ટન ખાતે રમાયેલી ભારત અને ઇંગ્લેન્ડ વચ્ચેની 1લી વનડે મેચ ભારતીય સમય અનુસાર બપોરે 3:30 વાગ્યે શરૂ થઈ હતી. પરંતુ, કાર્ડિફના સોફિયા ગાર્ડન્સ સ્ટેડિયમમાં રમાનારી 2જી વનડેનો સમય સાવ અલગ છે. આ મેચ માટે ભારતીય સમય અનુસાર સાંજે 5:00 વાગ્યે ટોસ ઉછળશે અને મેચનો અસલી રોમાંચ સાંજે 5:30 વાગ્યે શરૂ થશે. આ મેચનું લાઇવ ટેલિકાસ્ટ તમે ટીવી પર સોની સ્પોર્ટ્સ (Sony Sports) ચેનલ્સ પર જોઈ શકશો, જ્યારે મોબાઈલ પર મેચ જોનારા દર્શકો માટે જિયોસ્ટાર (JioStar) પર લાઇવ સ્ટ્રીમિંગ ઉપલબ્ધ રહેશે.
1લી વનડેમાં ભારતે મેળવી હતી શાનદાર જીત
અગાઉ ટી20 સિરીઝમાં નિરાશાજનક પ્રદર્શન બાદ, શુભમન ગિલની કેપ્ટનશીપ હેઠળ ટીમ ઇન્ડિયાએ 1લી વનડેમાં જોરદાર વાપસી કરીને 6 વિકેટે શાનદાર જીત મેળવી હતી. એજબેસ્ટનમાં રમાયેલી તે મેચમાં પહેલા બેટિંગ કરતા ઇંગ્લેન્ડની ટીમ 50 ઓવર પણ પૂરી રમી શકી ન હતી અને માત્ર 258 રનમાં જ સમેટાઈ ગઈ હતી. ઇંગ્લેન્ડ તરફથી જો રૂટે 76 અને 8મા ક્રમે બેટિંગ કરવા આવેલા લિયામ ડોસને 68 રન બનાવ્યા હતા. ભારત તરફથી અક્ષર પટેલે કમાલની બોલિંગ કરતા 4 વિકેટ ઝડપી હતી.
આ પણ વાંચોઃ વિશ્વ વિજેતા ક્રિકેટ ટીમનું બોર્ડ થયું કંગાળ, ICCએ આપી ₹123 કરોડની લોન
જવાબમાં ટાર્ગેટ ચેઝ કરવા ઉતરેલી ભારતીય ટીમની શરૂઆતમાં જ 2 મોટી વિકેટો પડી ગઈ હતી. વિરાટ કોહલી માત્ર 5 રન અને રોહિત શર્મા 11 રન બનાવીને સસ્તામાં પેવેલિયન પરત ફર્યા હતા. જોકે, ત્યારબાદ શુભમન ગિલે 80 રન ફટકાર્યા હતા. જ્યારે અક્ષર પટેલ (અણનમ 57) અને વોશિંગ્ટન સુંદર (અણનમ 52) એ મેચ વિનિંગ ઇનિંગ્સ રમીને માત્ર 4 વિકેટના નુકસાને 46મી ઓવરમાં જ ટીમને જીત અપાવી દીધી હતી. હવે ભારતીય ટીમની નજર ગુરુવારે 2જી વનડે જીતીને સિરીઝ પર કબ્જો જમાવવા પર રહેશે.
આ પણ વાંચોઃ શું બીજી વનડેમાં રોહિત-કોહલી નહીં રમે? કેપ્ટન શુભમન ગિલે કહ્યું - ‘અમે અલગ-અલગ કોમ્બિનેશન....’