IND vs SL ODI Live Streaming: ભારત અને શ્રીલંકા વચ્ચેની ત્રણ મેચની T20 શ્રેણી (IND vs SL) પૂરી થઈ ગઈ છે અને હવે બંને ટીમોએ ODI શ્રેણીની તૈયારી શરૂ કરી દીધી છે. આ શ્રેણીની પ્રથમ મેચ 10 જાન્યુઆરીએ ગુવાહાટીના બારસાપારા ક્રિકેટ સ્ટેડિયમમાં રમાશે. 5 દિવસમાં ત્રણ મેચ રમાશે. ત્રણેય મેચો ડે-નાઈટ રહેશે.
ટી-20 સીરીઝની સરખામણીમાં વનડે સીરીઝ માટે ટીમ ઈન્ડિયાની ટીમમાં ઘણો બદલાવ જોવા મળી રહ્યો છે. આ શ્રેણીમાં સિનિયર ખેલાડીઓની વાપસી થઈ રહી છે. રોહિત શર્મા, વિરાટ કોહલી અને કેએલ રાહુલ શ્રીલંકા સામેની વનડેમાં મોરચો સંભાળતા જોવા મળશે. જસપ્રીત બુમરાહ અને મોહમ્મદ શમી પણ આ સીરિઝમાંથી વનડે ટીમમાં વાપસી કરી રહ્યા છે. બીજી તરફ શ્રીલંકાની ટીમમાં વધુ ફેરફાર નથી.
ભારત-શ્રીલંકા વનડે શ્રેણીનું સંપૂર્ણ શેડ્યૂલ
પ્રથમ ODI: 10 જાન્યુઆરી, બપોરે 1.30 કલાકે (બારસાપારા ક્રિકેટ સ્ટેડિયમ, ગુવાહાટી)
બીજી ODI: 12 જાન્યુઆરી, બપોરે 1.30 કલાકે (ઈડન ગાર્ડન્સ, કોલકાતા)
ત્રીજી ODI: 15 જાન્યુઆરી, બપોરે 1.30 કલાકે (ગ્રીનફિલ્ડ ઇન્ટરનેશનલ સ્ટેડિયમ, તિરુવનંતપુરમ)
લાઈવ મેચો ક્યાં જોઈ શકાશે ?
ભારત અને શ્રીલંકા વચ્ચેની ત્રણ મેચની ODI શ્રેણીની તમામ મેચોનું સ્ટાર સ્પોર્ટ્સ નેટવર્કની ટીવી ચેનલો પર જીવંત પ્રસારણ કરવામાં આવશે. આ મેચોનું લાઈવ સ્ટ્રીમિંગ Disney + Hotstar એપ પર ઉપલબ્ધ હશે.
બંને ટીમોની પ્લેઈંગ ઈલેવન
ટીમ ઈન્ડિયાઃ રોહિત શર્મા (કેપ્ટન), કેએલ રાહુલ, વિરાટ કોહલી, સૂર્યકુમાર યાદવ, શ્રેયસ ઐયર, હાર્દિક પંડ્યા, અક્ષર પટેલ, યુઝવેન્દ્ર ચહલ, મોહમ્મદ શમી, મોહમ્મદ સિરાજ, જસપ્રીત બુમરાહ, શુભમન ગિલ, ઈશાન કિશન, વોશિંગ્ટન સુંદર, કુલદીપ યાદવ , ઉમરાન મલિક, અર્શદીપ સિંહ.
શ્રીલંકા: દાસુન શનાકા (કેપ્ટન), કુસલ મેન્ડિસ, ચરિથ અસલંકા, અશાન બંડારા, વાનિન્દુ હસરંગા, અવિષ્કા ફર્નાન્ડો, નુવાનિન્દુ ફર્નાન્ડો, ચમિકા કરુણારત્ને, લાહિરુ કુમારા, દિલશાન મદુશંકા, પથુમ નિસાંકા, પ્રમોદ મદુશન, કાસુન રાજિથા, સાદીરા સમરવિક્રમા, મહીષ તીક્ષણા, જેક્રી વાંદરસે, દુનિથ વેલાલગે.
સૂર્યા T20I રેન્કિંગમાં નંબર-1 બેટ્સમેન છે
સૂર્યકુમાર યાદવ હાલમાં ICC T20 આંતરરાષ્ટ્રીય રેન્કિંગમાં નંબર-1 બેટ્સમેન છે. ગયા વર્ષે તે એકમાત્ર એવો ખેલાડી હતો જેણે T20 ક્રિકેટમાં 1000થી વધુ રન બનાવ્યા હતા. અત્યાર સુધીમાં સૂર્યકુમારે 45 T20 આંતરરાષ્ટ્રીય મેચોમાં 180.34ની અદભૂત સ્ટ્રાઈક રેટથી 1578 રન બનાવ્યા છે. શનિવારે શ્રીલંકા સામે રમાયેલી ત્રણ મેચોની T20 શ્રેણીની છેલ્લી અને નિર્ણાયક મેચમાં તેણે 51 બોલમાં અણનમ 112 રન બનાવ્યા હતા. આ તેની T20 આંતરરાષ્ટ્રીય ક્રિકેટ કારકિર્દીની ત્રીજી સદી હતી.
શ્રીલંકા સામેની આ મેચમાં સૂર્યાએ 7 ચોગ્ગા અને 9 છગ્ગાની મદદથી તેની ત્રીજી T20 આંતરરાષ્ટ્રીય સદી ફટકારી હતી. T20 ઈન્ટરનેશનલમાં સૌથી વધુ સદી ફટકારવાના મામલે સૂર્યા ભારત માટે બીજા નંબર પર આવી ગયો છે. રોહિત શર્મા 4 સદી સાથે નંબર પર છે.
આ સિવાય તેણે ભારતીય ટીમ માટે T20માં બીજી સૌથી ઝડપી સદી ફટકારી હતી. આ મેચમાં તે 45 બોલમાં પોતાની સદી પૂરી કરી શક્યો હતો. તે જ સમયે, રોહિત શર્મા 35 બોલમાં સદી ફટકારીને આ મામલે નંબર વન પર છે. સૂર્યાની આ ઇનિંગના કારણે ભારતીય ટીમ 20 ઓવરમાં 5 વિકેટના નુકસાન પર 229 રન બનાવી શકી હતી.