અત્યારે સૈયદ મુશ્તાક અલી ટી20 ટ્રોફી રમાઈ રહી છે. ગુરૂવારે મેઘાલયની ટીમ મધ્ય પ્રદેશ વિરૂદ્ધ મેચ રમી રહી હતી. આ દરમિયાન એક સમયે મેઘાલયનો વિકેટકીપર બિષ્ટ મહેન્દ્ર સિંહ ધોનીની સ્ટાઈલ મારતો જોવા મળ્યો હતો.
મધ્ય પ્રદેશની ઈનિંગની 17મી ઓવરના છેલ્લા બોલે બિષ્ટને આ તક મળી હતી. અહીં રજત પાટીદાર બોલને પોઈન્ટ તરફ ટેબ કરી દોડી ગયો હતો પરંતુ ત્યાં ફિલ્ડર ઊભો હતો અને નોન-સ્ટ્રાઈકરે રન લેવાનું ના પાડી દીધું હતું. પાટીદાર ક્રિઝમાં પરત ફરવા દોડ્યો પણ તે પહેલાં જ બિષ્ટના હાથમાં બોલ આવી ગયો હતો. પાટીદાર ક્રીઝથી ઘણો દૂર હતો પણ બિષ્ટ સ્ટમ્પ તરફ પીઠ ફેરવીને ઊભો હતો અને તેણે સ્ટમ્પ તરફ જોયા વિના જ થ્રો કરી દીધો હતો જે સ્ટમ્પ ન લાગ્યો હતો અને બેટ્સમેનને જીવતદાન મળી ગયું હતું.