Rishabh Pant Health Updates: શુક્રવારે કાર અકસ્માતમાં ગંભીર રીતે ઘાયલ થયેલા રિષભ પંતને આઈસીયુમાંથી પ્રાઈવેટ રૂમમાં ખસેડવામાં આવ્યો છે. તે ઝડપથી સ્વસ્થ થઈ રહ્યો છે. મીડિયા રિપોર્ટ્સમાં આ વાત સામે આવી છે. દેહરાદૂનની મેક્સ હોસ્પિટલમાં તેની સારવાર ચાલી રહી છે. એવી પણ ચર્ચા છે કે BCCI તેમના પગના લિગામેંટ સારવાર માટે તેમને વિદેશ મોકલવાનો નિર્ણય પણ લઈ શકે છે.
રિષભ પંત શુક્રવારે વહેલી સવારે દિલ્હીથી રૂરકી જતા સમયે દિલ્હી-દહેરાદૂન હાઈવે પર અકસ્માતનો ભોગ બન્યા હતા. નિંદ્રા અને રસ્તા પર ખાડાને કારણે તેમની કાર બેકાબૂ થઈને રેલિંગ સાથે અથડાઈ અને પછી તેમાં આગની જ્વાળાઓ ઉભરાવા લાગી. આ અકસ્માતમાં પંતનો આબાદ બચાવ થયો હતો.
આ અકસ્માતમાં પંતના માથામાં બે કટ થયા હતા. તેના જમણા પગના ઘૂંટણનું લિગામેન્ટ પણ ફાટી ગયું હતું. તેના જમણા હાથના કાંડા, એડી અને અંગૂઠામાં પણ ઈજા થઈ છે. તેની પીઠ પર પણ ઊંડા ઈજાના નિશાન છે. તેની ગંભીર ઇજાઓને જોતા એવું કહેવામાં આવી રહ્યું છે કે તે આગામી કેટલાક મહિનાઓ સુધી મેદાન પર ઉતરી શકશે નહીં.
આરામ કરવાનો સમય નથી
રિષભ પંતના પરિવારનું કહેવું છે કે વારંવાર મુલાકાતીઓને કારણે રિષભ યોગ્ય રીતે આરામ કરી શકતો નથી. હોસ્પિટલની મેડિકલ ટીમ પણ કહે છે કે રિષભને ઝડપથી સ્વસ્થ થવા માટે માનસિક અને શારીરિક આરામની જરૂર છે, પરંતુ મુલાકાતીઓ તેને મળવા સતત આવી રહ્યા છે. સ્ટાફનું કહેવું છે કે હાલમાં લોકોએ તેમને મળવાનું ટાળવું જોઈએ. તમને જણાવી દઈએ કે દેહરાદૂનની મેક્સ હોસ્પિટલમાં રિષભને મળવા માટે ઘણા હાઈપ્રોફાઈલ લોકો સતત આવી રહ્યા છે, જેમાંથી રાજકારણ સાથે જોડાયેલા લોકોની સંખ્યા ઘણી વધારે છે.
30 ડિસેમ્બરે થયેલા અકસ્માત બાદ ઘણા લોકો પંતને મળવા મેક્સ હોસ્પિટલ પહોંચ્યા હતા. સીએમ પુષ્કર સિંહ ધામી, અભિનેતા અનુપમ ખેર અને અનિલ કપૂર, સાથી ક્રિકેટર નીતીશ રાણા અને ખાનપુરના ધારાસભ્ય ઉમેશ કુમાર તેમજ સ્થાનિક વહીવટી અધિકારીઓ પંતને ICU વોર્ડમાં મળ્યા હતા. અગાઉ, દિલ્હી અને ડિસ્ટ્રિક્ટ ક્રિકેટ એસોસિએશન (DDCA) ના ડિરેક્ટર શ્યામ શર્માની આગેવાની હેઠળની એક ટીમ પણ શનિવારે, 31 ડિસેમ્બરે પંતને મળ્યાં હતાં.