Rohit Sharma News: રોહિત શર્માને હાલમાં જ ટેસ્ટ ટીમનો કેપ્ટન બનાવવામાં આવ્યો છે. આ પહેલા હિટ મેનને ODI અને T20નો કેપ્ટન બનાવવામાં આવ્યો હતો. દક્ષિણ આફ્રિકા સામેની ટેસ્ટ શ્રેણીમાં ભારતની હાર બાદ વિરાટ કોહલીએ સુકાની પદેથી રાજીનામું આપી દીધું હતું. આ પછી BCCIએ રોહિતને ટેસ્ટ ટીમનો કેપ્ટન બનાવ્યો. રોહિતની કપ્તાનીમાં ભારતીય ટીમ શ્રીલંકા સામે ટેસ્ટ શ્રેણી રમશે, જે 4 માર્ચથી શરૂ થશે. ભારતે શ્રીલંકા સામે 2 ટેસ્ટ મેચ રમવાની છે. તે પહેલા ભારતીય ટીમ શ્રીલંકા સામે 3 મેચની T20 સિરીઝ રમશે, જેની પ્રથમ T20 મેચ 24 ફેબ્રુઆરીએ રમાશે. શ્રીલંકા સામેની T20 શ્રેણી પહેલા રોહિતે વર્ચ્યુઅલ પ્રેસ કોન્ફરન્સમાં પત્રકારો સાથે વાત કરી હતી.
આ ત્રણ ખેલાડીમાં છે ભવિષ્યમાં કેપ્ટન બનવાની ક્ષમતાઃ રોહિત શર્મા
વાતચીત દરમિયાન રોહિતે ત્રણ એવા ખેલાડીઓના નામ લીધા જે ભવિષ્યમાં ભારતીય ટીમની કેપ્ટનશીપ કરી શકે. રોહિતે સીધું કહ્યું કે ઋષભ પંત, કેએલ રાહુલ અને બુમરાહ એવા ખેલાડીઓ છે જે આ ભારને વહન કરવામાં સક્ષમ છે. તેમનામાં નેતૃત્વની ગુણવત્તા છે.
રોહિતે વધુમાં કહ્યું કે, 'તેઓ સમજે છે કે તેમના ખભા પર જવાબદારી છે, પરંતુ અમે તેમના પર કોઈ દબાણ લાવવા નથી માંગતા કારણ કે તેઓ અમારા માટે મહત્વપૂર્ણ છે, અમે માત્ર ઇચ્છીએ છીએ કે તેઓ રમતનો આનંદ માણે અને ટીમને તેમનું પ્રદર્શન બતાવી મેચ જીતાડે.' મીડિયા સાથે વાત કરતા રોહિતે ખેલાડીઓના વર્કલોડ પર પણ વાત કરી અને કહ્યું, "હું મારા મગજમાં ખૂબ જ સ્પષ્ટ છું કે આપણે તેને કેવી રીતે આગળ લઈ જવાનું છે. વર્કલોડને મેનેજ કરવું જરૂરી છે. માત્ર હું જ નહીં પરંતુ દરેક ખેલાડી માટે તે જરૂરી છે. અમે ઈજાઓ જોઈ છે. અમારા સાથી ખેલાડીઓને અમે વિરામ આપીએ છીએ, અમે તેને મેનેજ કરવાનો પ્રયાસ કરી રહ્યા છીએ. અમે આગળ વધવા માટે રોડમેપ બનાવવાનો પ્રયાસ કરી રહ્યા છીએ.
પોતાના વર્કલોડને લઈ શું કહ્યું રોહિત શર્માએ
રોહિત શર્માએ પણ પોતાના વર્કલોડ વિશે વાત કરી અને કહ્યું, 'જ્યાં સુધી મારી વાત છે, ત્યાં કોઈ સમસ્યા નથી, હું બધી મેચ રમવા માટે ઉત્સુક છું, વર્કલોડ તેના પછી શું થાય છે તેના પર નિર્ભર છે. જો તમને વિરામ લેવાની તક હોય, તો તમે વિરામ લો. હમણાં માટે, તે સારું લાગે છે."