T20 World Cup 2024: અનુભવી ઓલરાઉન્ડર શાકિબ અલ હસનની અણનમ અડધી સદી બાદ રિશાદ હુસૈનની શાનદાર બોલિંગની મદદથી બાંગ્લાદેશે T20 વર્લ્ડ કપની ગ્રુપ Dની મેચમાં નેધરલેન્ડને 25 રનથી હરાવ્યું હતું. ત્રણ મેચમાં બાંગ્લાદેશની આ બીજી જીત છે અને તેણે સુપર આઠમાં પહોંચવાની આશા જીવંત રાખી છે. બીજી તરફ શ્રીલંકા માટેનો પ્રવાસ હવે સમાપ્ત થઈ ગયો છે અને તેના માટે આગળ વધવું શક્ય નથી.
બાંગ્લાદેશે શાકિબના 46 બોલમાં નવ ચોગ્ગાની મદદથી અણનમ 64 રનની મદદથી 20 ઓવરમાં પાંચ વિકેટે 159 રન બનાવ્યા હતા. જવાબમાં નેધરલેન્ડની ટીમ 20 ઓવરમાં આઠ વિકેટે 134 રન જ બનાવી શકી હતી. નેધરલેન્ડ માટે સાયબ્રાન્ડ એન્ગલબ્રટે 22 બોલમાં સૌથી વધુ 33 રન બનાવ્યા હતા. બાંગ્લાદેશ માટે લેગ સ્પિનર રિશાદ હુસૈને શાનદાર બોલિંગ કરી અને ત્રણ વિકેટ ઝડપી અને પોતાની ટીમને જીત અપાવવામાં મહત્વની ભૂમિકા ભજવી.
બાંગ્લાદેશની આશા અકબંધ
ત્રણ મેચમાં બાંગ્લાદેશની આ બીજી જીત છે અને તેણે સુપર આઠમાં પહોંચવાની આશા જીવંત રાખી છે. આ હાર છતાં નેધરલેન્ડની ટીમ હજુ સંપૂર્ણ રીતે રેસમાંથી બહાર થઇ નથી. જો નેધરલેન્ડ્સ તેની આશા જીવંત રાખવા માંગે છે તો તેણે કોઈપણ કિંમતે ગ્રુપ સ્ટેજની તેની છેલ્લી મેચ જીતવી પડશે. જોકે હવે નેધરલેન્ડ માટે આગળનો રસ્તો મુશ્કેલ બની ગયો છે. હાલમાં દક્ષિણ આફ્રિકાની ટીમ ગ્રુપ-ડીમાંથી આગળના રાઉન્ડ માટે ક્વોલિફાય થઈ ગઈ છે. શ્રીલંકન ટીમની સફર સત્તાવાર રીતે બાંગ્લાદેશની જીત સાથે સમાપ્ત થઈ છે. શ્રીલંકા ટૂર્નામેન્ટમાંથી બહાર થનારી ત્રીજી ટીમ છે. આ પહેલા ગ્રુપ બીમાંથી નામિબિયા અને ઓમાનની સફર પણ ગ્રુપ સ્ટેજમાં સમાપ્ત થઈ ગઈ છે. શ્રીલંકાના બે હાર અને એક ડ્રો સાથે ત્રણ મેચમાંથી એક પોઈન્ટ છે. ટીમ પાસે માત્ર એક જ મેચ બાકી છે અને જો શ્રીલંકા આ મેચ જીતવામાં સફળ થાય તો પણ તેના માત્ર ત્રણ પોઈન્ટ હશે જ્યારે બાંગ્લાદેશની ટીમના ચાર પોઈન્ટ છે.
ટાર્ગેટનો પીછો કરતા નેધરલેન્ડે માઈકલ લેવિટ અને મેક્સ ડાઈડે પ્રથમ વિકેટ માટે 22 રનની ભાગીદારી સાથે મક્કમ શરૂઆત કરી હતી. બંને બેટ્સમેનોએ ચાર ઓવર સુધી એકપણ વિકેટ પડવા દીધી ન હતી, પરંતુ તસ્કીન અહેમદે લેવિટને આઉટ કરીને નેધરલેન્ડને પહેલો ઝટકો આપ્યો હતો. લેવિટ 18 રન બનાવીને આઉટ થયો હતો. આ પછી તન્ઝીમ હસન સાકિબે મેક્સ ડાઈડને આઉટ કરીને નેધરલેન્ડને બીજો ઝટકો આપ્યો હતો. આ પછી વિક્રમજીત સિંહે સાઇબ્રાન્ડ એન્ગલબ્રટ સાથે મળીને ઈનિંગને સંભાળી હતી..એન્ગલબ્રટ અને વિક્રમજીતે ત્રીજી વિકેટ માટે 37 રન જોડ્યા હતા, પરંતુ મહમુદુલ્લાહે વિક્રમજીતને આઉટ કરીને આ ભાગીદારી તોડી હતી.
આ પહેલા નેધરલેન્ડના કેપ્ટન સ્કોટ એડવર્ડ્સે ટોસ જીતીને બાંગ્લાદેશને પ્રથમ બેટિંગ માટે આમંત્રણ આપ્યું હતું, પરંતુ તેની શરૂઆત સારી રહી ન હતી. બાંગ્લાદેશે કેપ્ટન નઝમુલ હુસેન શાંતો અને વિકેટકીપર બેટ્સમેન લિટન દાસની વિકેટ વહેલી ગુમાવી દીધી હતી. આર્યન દત્તે આ બંને બેટ્સમેનોને પોતાનો શિકાર બનાવ્યા હતા. આર્યને પહેલા શાંતોને વિક્રમજીત સિંહના હાથે કેચ કરાવ્યો જે ત્રણ બોલમાં એક રન બનાવીને આઉટ થયો હતો.