ભારતીય ક્રિકેટના ઉભરતા સ્ટાર વૈભવ સૂર્યવંશી તેના પહેલા સિનિયર આંતરરાષ્ટ્રીય પ્રવાસ પહેલા જ સમાચારમાં છે. જોકે, આ વખતે તેનું કારણ તેની બેટિંગ નથી પરંતુ એક ખાસ નિયમ છે જે ઇંગ્લેન્ડ પ્રવાસ દરમિયાન લાગુ કરવામાં આવશે. 15 વર્ષીય વૈભવને ભારતના ઇંગ્લેન્ડ પ્રવાસ દરમિયાન તેના સાથી ખેલાડીઓથી અલગ ચેન્જિંગ રૂમનો ઉપયોગ કરવો પડશે. આ વ્યવસ્થા ICCના સેફગાર્ડિંગ (બાળ સુરક્ષા) નિયમો હેઠળ કરવામાં આવી રહી છે. ICC અને ઇંગ્લેન્ડ અને વેલ્સ ક્રિકેટ બોર્ડ (ECB) ના નિયમો અનુસાર, 16 વર્ષથી ઓછી ઉંમરના ખેલાડીઓ પુખ્ત ખેલાડીઓ સાથે એક જ ચેન્જિંગ રૂમ શેર કરી શકતા નથી.
ECB એ આ વ્યવસ્થાની પુષ્ટી કરતા કહ્યું કે ઇંગ્લેન્ડમાં શ્રેણી ICC અધિકારક્ષેત્ર હેઠળ આવતી હોવાથી તેના સેફગાર્ડિંગ પ્રોટોકોલ લાગુ થશે. ECB એ જણાવ્યું હતું કે, ICC નિયમો ઉપરાંત બોર્ડની "સેફ હેન્ડ્સ" નીતિ પણ સમગ્ર પ્રવાસ દરમિયાન અમલમાં રહેશે. વૈભવની ઉંમરને ધ્યાનમાં રાખીને વધારાની સુરક્ષા અને સંભાળની વ્યવસ્થા કરવામાં આવી છે. તેના માતા-પિતા સમગ્ર પ્રવાસ દરમિયાન તેની સાથે રહેશે અને ભારતીય ટીમ સાથે જ હોટલમાં રહેશે. સામાન્ય રીતે આવું થતું નથી પરંતુ વૈભવની ઉંમરને ધ્યાનમાં રાખીને ખાસ પરવાનગી આપવામાં આવી છે. ECBનું માનવું છે કે તેના પરિવારની હાજરીથી યુવાન ખેલાડીને જરૂરી ટેકો અને સંભાળ મળશે.
બ્રિટિશ અખબાર 'ધ ગાર્ડિયન'ના અહેવાલ મુજબ, આ નિયમો વૈભવની ક્રિકેટ પ્રવૃત્તિઓને અસર કરશે નહીં. તે મેચ દરમિયાન ટીમ ઈન્ડિયાના ડ્રેસિંગ રૂમમાં હાજર રહેશે, ટીમ મીટિંગમાં ભાગ લેશે, પ્રેક્ટિસ કરશે અને ક્રિકેટ સંબંધિત તમામ પ્રવૃત્તિઓમાં સંપૂર્ણ રીતે ભાગ લેશે. આ પ્રતિબંધ ફક્ત મેચ પહેલા અને પછી કપડાં બદલવા પર લાગુ થશે.
આ પણ વાંચોઃ ટીમ ઈન્ડિયામાં ક્યા નંબરની જર્સી પહેરશે વૈભવ સૂર્યવંશી? BCCI કર્યો ખુલાસો
શું આયરલેન્ડ પ્રવાસ દરમિયાન વૈભવનો ડ્રેસિંગ રૂમ અલગ રહેશે?
ઇંગ્લેન્ડ શ્રેણી ICC અધિકારક્ષેત્ર હેઠળ યોજાઈ રહી છે, તેથી આ નિયમો ત્યાં લાગુ પડશે. જોકે, આ વ્યવસ્થા આયરલેન્ડ સામેની બે T20 મેચો પર લાગુ થશે નહીં, કારણ કે તે મેચો ક્રિકેટ આયરલેન્ડના નિયંત્રણ હેઠળ યોજાઈ રહી છે. રસપ્રદ વાત એ છે કે ભારતીય સ્થાનિક ક્રિકેટ અને IPLમાં આવા કોઈ નિયમો નથી. રાજસ્થાન રોયલ્સ તરફથી રમતો વૈભવ છેલ્લા બે સીઝનથી સિનિયર ખેલાડીઓ સાથે ડ્રેસિંગ રૂમ શેર કરી રહ્યો છે.
વૈભવ સૂર્યવંશીની ક્રિકેટ સફર ઝડપથી આગળ વધી રહી છે. 14 વર્ષની ઉંમરે IPLમાં ડેબ્યૂ કરનાર આ બેટ્સમેને પોતાની પહેલી સીઝનમાં રાજસ્થાન રોયલ્સ માટે 252 રન બનાવ્યા હતા. દરમિયાન તેણે પુરુષોની T20 ક્રિકેટમાં કિશોર વયે સૌથી ઝડપી સદી પણ ફટકારી હતી, જે ફક્ત 38 બોલમાં હતી.
વૈભવે IPL 2026માં કેવું પ્રદર્શન કર્યું?
ત્યારબાદ તેણે પોતાના પ્રદર્શનને વધુ ઉન્નત બનાવ્યું અને IPL 2026 સીઝનમાં 776 રન બનાવીને સૌથી વધુ રન કરનાર ખેલાડી બન્યો. તેણે 72 સિક્સર ફટકારીને ક્રિસ ગેલનો એક સીઝનમાં સૌથી વધુ સિક્સર ફટકારવાનો રેકોર્ડ પણ તોડ્યો હતો.
શ્રીલંકા A સામે 29 બોલમાં 94 રન બનાવ્યા
તાજેતરમાં શ્રીલંકા A સામે ત્રિકોણીય શ્રેણીની ફાઇનલમાં વૈભવે ભારત A માટે માત્ર 29 બોલમાં 94 રન બનાવ્યા. આ ઇનિંગ દરમિયાન તેણે માત્ર 11 બોલમાં પોતાની અડધી સદી પૂરી કરી લિસ્ટ A ક્રિકેટમાં સૌથી ઝડપી અડધી સદીનો રેકોર્ડ બનાવ્યો હતો.
વૈભવ ક્યારે T20 આંતરરાષ્ટ્રીય ક્રિકેટમાં ડેબ્યૂ કરશે?
બધાની નજર હવે શુક્રવારે બેલફાસ્ટમાં આયરલેન્ડ સામેની પ્રથમ T20I પર છે. જો વૈભવને આ મેચમાં ડેબ્યૂ કરવાની તક મળે છે, તો તે ભારતનો સૌથી યુવા આંતરરાષ્ટ્રીય ક્રિકેટર બનશે. હાલમાં આ રેકોર્ડ સચિન તેંડુલકરના નામે છે, જેમણે 1989માં 16 વર્ષ અને 205 દિવસની ઉંમરે પાકિસ્તાન સામે ટેસ્ટ ડેબ્યૂ કર્યું હતું. સચિન તેંડુલકર પછી ભારતીય ક્રિકેટમાં સૌથી મોટા ટીનેજ સ્ટાર ગણાતા વૈભવ સૂર્યવંશી માટે ઇંગ્લેન્ડ પ્રવાસ તેની કારકિર્દીમાં વધુ એક ઐતિહાસિક સીમાચિહ્નરૂપ સાબિત થઈ શકે છે.