કેનબરામાં રમાયેલી પ્રથમ ટી20માં રવિન્દ્ર જાડેજા 23 બોલમાં 5 ફોર અને 1 સિક્સની મદદથી 44 રન બનાવી અણનમ રહ્યો હતો. તેની સાથે જ જાડેજા નંબર 7 પર બેટિંગ કરતા ઈન્ટરનેશનલ ટી 20માં સર્વશ્રેષ્ઠ સ્કોર કરનાર ભારતીય બેટ્સમેન બની ગયો છે. આ દરમિયાન તેણે ટીમ ઈન્ડિયાના પૂર્વ કેપ્ટન એમ એસ ધોનીનો રેકોર્ડ તોડી દીધો છે. ધોનીએ ઈંગ્લેન્ડ સામે વર્ષ 2012માં વાનખેડેમાં 18 બોલમાં 38 રન બનાવ્યા હતા.
સીરિઝની પ્રથમ ટી20 મેચમાં ભારતે ઓસ્ટ્રેલિયાને 162 રનનો ટાર્ગેટ આપ્યો હતો. લક્ષ્યાંકનો પીછો કરતા ઓસ્ટ્રેલિયન ટીમ 20 ઓવરમાં 7 વિકેટે 150 રન જ કરી શકી હતી. ભારત માટે ટી. નટરાજન અને યુઝવેન્દ્ર ચહલે 3-3 વિકેટ લીધી. આ મેચમાં જાડેજાને માથામાં બોલ વાગતા યુઝવેન્દ્ર ચહલ ‘કન્કશન સબ્સ્ટીટ્યૂટ’ ખેલાડી તરીકે જાડેજાની જગ્યાએ મેદાનમાં ઉતર્યો હતો. ચહલે શાનદાર બોલિંગ કરતા 3 વિકેટ ઝડપી હતી. 12માં ખેલાડી ચહલને મેન ઓફ ધ મેચ આપવામાં આવી હતી.