IPL 11: વિરાટને આઉટ કરીને જાડેજાએ કેમ ન મનાવ્યો જશ્ન ? જણાવ્યું આ કારણ

જાડેજાએ કિંમતી અને મહત્વપૂર્ણ વિકેટ લીધી હોવા છતાં મેદાન પર કોઈ જાતનો જશ્ન મનાવ્યો હતો. જાડેજાને શાંત જોઈ ન માત્ર મેચ જોઈ રહેલા દર્શકો દંગ રહી ગયા પરંતુ કોમેન્ટ્રી બોક્સમાં બેઠેલા દિગ્ગજ ઓલરાઉન્ડર કપિલ દેવે પણ આશ્ચર્ય વ્યક્ત કર્યું.

રોયલ ચેલેન્જર્સ બેંગ્લોરને 127 રન સુધી મર્યાદિત રાખ્યા બાદ જાડેજાએ જશ્ન ન મનાવવાનું રહસ્ય ખોલતાં જણાવ્યું કે, વિકેટ થોડી સૂકી હતી અને હું મારી બોલિંગનો આનંદ લઇ રહ્યો હતો. તે મારો પ્રથમ જ બોલ હતો અને હું જશ્ન મનાવવા માટે તૈયાર નહોતો. વિરાટની મોટી વિકેટ લીધી હોવાથી હું આગળ પણ મારી લય જાળવી રાખવા માંગતો હતો.

આઈપીએલમાં જાડેજા શેન વોટસનને 5 વખત, સ્ટિવ સ્મિથને 4 વખત અને ગ્લેન મેક્સવેલ, વિરાટ કોહલી તથા રોબિન ઉથપ્પાને 3-3 વખત આઉટ કરી ચુક્યો છે.

આરસીબીની ઇનિંગની સાતમી ઓવરના પ્રથમ બોલ પર વિરાટ કોહલીની વિકેટ પડી હતી. કોહલી એવા બોલ પર બોલ્ડ થયો કે જેને લઇ તે માનવા તૈયાર નહોતો. આ સમયે તેના માટે આશ્ચર્ય વ્યક્ત કરવા સિયાય કોઈ વિકલ્પ જ નહોતો બચ્યો.

બેંગલોરઃ ચેન્નાઈ સુપર કિંગ્સના રવીન્દ્ર જાડેજાની ફિરકીએ શનિવારે રોયલ ચેલેન્જર્સ બેંગલુરુની કમર તોડી નાંખી હતી. ધોનીએ જાડેજાને બોલિંગ સોંપતા જ તેણે આરસીબીના કેપ્ટન વિરાટ કોહલીને 8 રનના અંગત સ્કોર પર પેવેલિયન મોકલી દીધો હતો. જાડેજાએ કોહલીને બોલ્ડ કર્યો હતો.

જાડેજાએ 4 ઓવરમાં 18 રન આપીને ત્રણ વિકેટ લીધી હતી. તેના આ પ્રદર્શન માટે તેને મેન ઓફ ધ મેચ જાહેર કરવામાં આવ્યો હતો.