IPL હરાજીઃ ઓસ્ટ્રેલિયા સામેની જીતના હીરો પૂજારાની બેઝ પ્રાઈસ છે કેટલી, કોણ ખરીદી શકે છે?

નવી દિલ્હીઃ હાલમાં ચાલી રહેલા ચાર ટેસ્ટ મેચોની સીરીઝમાં પ્રથમ ટેસ્ટમાં શાનદાર પ્રદર્શન કરી જીતનો હીરો બનેલો ચેતેશ્વર પુજારા પણ આઇપીએલમાં નસીબ અજમાવશે. આગામી 18 ડિસેમ્બરે જયપુરમાં હરજી થવાની છે.

50 લાખની બેઝ પ્રાઇઝના લિસ્ટમાં પુજારા ઉપરાંત મનોજ તિવારી, હનુમા વિહારી, ગુરુકિરત સિંઘ અને મોહિત શર્મા સામેલ છે.

જયપુરની ઓક્શનમાં કુલ 346 ખેલાડીઓની બોલી લાગશે જેમાં ભારતના સૌથી વધુ 226 ખેલાડીઓ સામેલ થયા છે. આમાં એક નામ એડિલેડ જીતના હીરો ચેતેશ્વર પુજારાનું પણ છે. આ વખતની હરાજીમાં પુજારાની બેઝ પ્રાઇઝ 50 લાખ રાખવામાં આવી છે.

ઉલ્લેખનીય છે કે, આઇપીએલ હરાજી માટે 1,003 ખેલાડીઓએ પોતાનુ રજિસ્ટ્રેશન કરાવ્યુ હતુ અને 8 ફ્રેન્ચાઇઝી ટીમો દ્વારા શોર્ટલિસ્ટ જમા કરાવ્યા બાદ અંતિમ ખેલાડીઓનું ફાઇનલ લિસ્ટ તૈયાર કરવામાં આવ્યુ હતું.