અમદાવાદઃ આજે ઇન્ડિયન પ્રિમિયર લીગની ફાઇનલમાં ચેન્નઈ સુપર કિંગ્સનો મુકાબલો ગુજરાત ટાઇટન્સ સામે થશે. બંને ટીમો વચ્ચેની આ મેચ અમદાવાદના નરેન્દ્ર મોદી સ્ટેડિયમમાં રમાશે. અમદાવાદમાં એક લાખથી વધુ પ્રેક્ષકોની સામે બંને ખેલાડીઓ વચ્ચે ટીમો રસપ્રદ મેચ યોજાય તેવી શક્યતા છે.
હાર્દિકે ગયા વર્ષે તેની પ્રથમ સીઝનમાં ગુજરાત ટાઇટન્સને ચેમ્પિયન બનાવ્યું. આ વખતે હાર્દિક માટે મોટો પડકાર છે. તેણે પોતાના મેન્ટર ધોનીને તેના હોમ ગ્રાઉન્ડ પર એક લાખ દર્શકોની સામે હરાવવો પડશે. જો તે આમ કરે છે, તો ફ્રેન્ચાઇઝી ક્રિકેટની સાથે સાથે ભારતીય ક્રિકેટમાં તેની કેપ્ટનશિપ લાંબા સમય સુધી જોવા મળી શકે છે.
ધોની પાસે રોહિતની બરોબરી કરવાની તક
ધોનીની વાત કરીએ તો તેણે કોઈને કંઈ સાબિત કરવાની જરૂર નથી. તેની ગણતરી ક્રિકેટના મહાન કેપ્ટનોમાં થાય છે. ધોની તેની કારકિર્દીના અંતિમ તબક્કામાં છે. એવું માનવામાં આવે છે કે આ તેની છેલ્લી સીઝન છે. તે તેની અંતિમ આઈપીએલ સીઝનમાં ટ્રોફીની જીત સાથે વિદાય કરવા માંગશે. જો ધોની આ વખતે ચેન્નઈને ચેમ્પિયન બનાવશે તો તે પાંચમી વખત આઈપીએલ ટ્રોફી પોતાના નામે કરશે. તે સૌથી વધુ ટાઇટલના મામલે રોહિત શર્મા (મુંબઈ ઈન્ડિયન્સ)ની બરોબરી કરશે.
બંને ટીમો પાંચમી વખત આમને-સામને થશે
ચેન્નઈ અને ગુજરાત વચ્ચે આઈપીએલમાં અત્યાર સુધીમાં ચાર મેચ રમાઈ છે. બંને ટીમો વચ્ચે આ પાંચમી મેચ હશે. ગુજરાતે ચારમાંથી ત્રણ મેચ જીતી છે. આ સાથે જ ચેન્નઈએ એક વખત જીત મેળવી છે. ગત વર્ષે હાર્દિક પંડ્યાની ટીમે ચેન્નઈને બે મેચમાં હરાવ્યું હતું. આ વખતે પ્રથમ મેચમાં હાર્દિકે જીત મેળવી હતી. ધોનીએ ક્વોલિફાયર-1માં આ હારનો બદલો લીધો હતો. ચેન્નઈએ ગુજરાતને હરાવી ફાઇનલમાં સ્થાન મેળવ્યું હતું.
આ IPL 31 માર્ચે નરેન્દ્ર મોદી સ્ટેડિયમમાં જ શરૂ થઈ હતી. ત્યારે ગુજરાત અને ચેન્નઈની ટીમો આમને-સામને હતી. હવે આ મેદાન પર આ જ બે ટીમો વચ્ચે IPLની ફાઇનલ મેચ રમાશે.
ફાઇનલમાં ચેન્નઇ અને ગુજરાતનો રેકોર્ડ
ચેન્નઈની ટીમ રેકોર્ડ 10મી વખત ફાઈનલ મેચ રમશે. તે અત્યાર સુધીમાં ચાર વખત ચેમ્પિયન બની છે. તેને પાંચ ફાઇનલમાં હારનો સામનો કરવો પડ્યો છે. છેલ્લી ત્રણ ફાઈનલ મેચોની વાત કરીએ તો ચેન્નઈ બે વખત (2018, 2021) જીતવામાં સફળ રહી. એકવાર (2019) તેને હારનો સામનો કરવો પડ્યો હતો. બીજી તરફ ગુજરાત માટે આ માત્ર બીજી ફાઈનલ છે. તે છેલ્લી વખત ચેમ્પિયન હતી.