Yuvraj Singh Head Coach Gujarat Titans: IPL 2025 મેગા હરાજી પહેલા (IPL 2025 Mega Auction), ગુજરાત ટાઇટન્સના (Gujarat Titans) મુખ્ય કોચ આશિષ નેહરા (Ashish Nehra) અને ક્રિકેટ ડિરેક્ટર વિક્રમ સોલંકી (Vikram Solanki) ફ્રેન્ચાઇઝી છોડી શકે છે. હવે એક મીડિયા રિપોર્ટમાં ખુલાસો થયો છે કે મુખ્ય કોચના પદ માટે યુવરાજ સિંહને (Yuvraj Singh) વિકલ્પ માનવામાં આવી રહ્યો છે. જો કે હજી સુધી કોઈ પુષ્ટિ થઈ નથી, ટીમના માર્ગદર્શક ગેરી કર્સ્ટને તેમના પદ પરથી રાજીનામું આપ્યું ત્યારથી GTમાં પરિવર્તનનો સમયગાળો શરૂ થયો છે.
સ્પોર્ટ્સ18 મુજબ ગુજરાત ટાઇટન્સની અંદર ઘણા ફેરફારો શક્ય છે. આશિષ નેહરા અને વિક્રમ સોલંકી સંભવતઃ ટીમ છોડવા જઈ રહ્યા છે અને મુખ્ય કોચ પદ માટે યુવરાજ સિંહના નામ પર ચર્ચા શરૂ થઈ ગઈ છે. જોકે આ અંગે કોઈ પુષ્ટિ થઈ નથી, પરંતુ ગુજરાત ટાઇટન્સના કોચિંગ સ્ટાફમાં મોટા ફેરફારો શક્ય છે. જીટીના વર્તમાન કોચિંગ સ્ટાફમાં આશિષ કપૂર, નઈમ અમીન, નરેન્દ્ર નેગી અને મિથુન મનહાસ પણ સામેલ છે, પરંતુ રિપોર્ટ અનુસાર, આ તમામ લોકોએ નવી તકો શોધવાનું શરૂ કર્યું છે.
અદાણી ગ્રુપ GTમાં હિસ્સો ખરીદી શકે છે
આ સિવાય એવી અટકળો છે કે અદાણી ગ્રુપ IPL 2025ની શરૂઆત પહેલા ગુજરાત ટાઇટન્સમાં હિસ્સો ખરીદી શકે છે. કદાચ આ જ કારણે ગુજરાતની ટીમમાં ઘણા મોટા ફેરફારો થયા છે. IPLમાંથી નિવૃત્તિ લીધા બાદ યુવરાજ સિંહ કોઈપણ ટીમ સાથે સંકળાયેલો ન હોવાથી તેને ગુજરાત ટાઇટન્સના મુખ્ય કોચ બનાવવો એ ખૂબ જ આશ્ચર્યજનક નિર્ણય સાબિત થશે. યુવરાજ છેલ્લે 2019માં આઈપીએલમાં ખેલાડી તરીકે જોવા મળ્યો હતો. એ પણ નોંધનીય છે કે GTનો કેપ્ટન શુભમન ગિલ છે, જે યુવરાજની જેમ પંજાબથી આવે છે.
ગુજરાત ટાઇટન્સ એક વખત ચેમ્પિયન છે
ગુજરાત ટાઇટન્સ ફ્રેન્ચાઇઝીએ વર્ષ 2022માં IPLમાં પ્રવેશ કર્યો હતો. આશિષ નેહરા પ્રથમ સિઝનથી જ જીટીના મુખ્ય કોચ છે અને તેમણે 2022માં ગુજરાતને IPL ચેમ્પિયન બનાવવામાં મહત્વપૂર્ણ યોગદાન આપ્યું હતું. આ ટીમ 2023માં રનર અપ રહી હતી, પરંતુ IPL 2024માં GTનું પ્રદર્શન ઘણું ખરાબ હતું કારણ કે ટીમ પોઈન્ટ ટેબલમાં આઠમા ક્રમે હતી.