સાઉથ આફ્રિકાએ રચ્યો ઈતિહાસ, 48 વર્ષ બાદ ઓસ્ટ્રેલિયા સામે ઘર આંગણે જીતી ટેસ્ટ શ્રેણી

જોહાનિસબર્ગઃ બોલ ટેમ્પરિંગ વિવાદ બાદ જોહાનિસબર્ગમાં યજમાન સાઉથ આફ્રિકા અને પ્રવાસી ઓસ્ટ્રેલિયા વચ્ચે રમાયેલી ચોથી ટેસ્ટ મેચમાં 492 રને ભવ્ય વિજય થયો હતો. સાઉથ આફ્રિકા 1970 બાદ સાઉથ આફ્રિકાનો ઓસ્ટ્રેલિયા સામે આ પ્રથમ શ્રેણી વિજય છે. સાઉથ આફ્રિકાએ ઓસ્ટ્રેલિયાએ સામે 3-1થી શ્રેણી જીતી હતી.

સ્મિથ પર એક વર્ષનો પ્રતિબંધ લાગ્યા બાદ ટીમ પેનીએ ઓસ્ટ્રેલિયાની કેપ્ટનશિપ કરી હતી.

મેચમાં કુલ 9 વિકેટ અને બંને ઇનિંગમાં થઈ 45 રન નોંધાવનારા ફિલાન્ડરને મેન ઓફ ધ મેચ જાહેર કરવામાં આવ્યો હતો.

612 રનના ટાર્ગેટને હાંસલ કરવા ઉતરેલી ઓસ્ટ્રેલિયાની ટીમની બીજી ઈનિંગ 46.4 ઓવરમાં માત્ર 119 રનમાં જ સમેટાઇ ગઈ હતી. વોર્નર, સ્મિથ, બેનક્રોફ્ટ વગર ચોથી ટેસ્ટમાં મેદાનમાં ઉતરેલી ઓસ્ટ્રેલિયાની ટીમમાંથી બીજી ઇનિંગમાં માત્ર 2 બેટ્સમેનો જ ડબલ આંકડામાં સ્કોર કરી શક્યા હતા. સાઉથ આફ્રિકા વતી બીજી ઇનિંગમાં ફિલાન્ડરે 6, મોર્કલે 2 અને મહારાજે 1 વિકેટ લીધી હતી.

સાઉથ આફ્રિકાએ બીજી ઈનિંગમાં કેપ્ટન ડુપ્લેસિસના 120 અને એલ્ગરના 81 રનની મદદથી 6 વિકેટના નુકસાન પર 344 રન બનાવી ઇનિંગ ડિક્લેર કરી હતી. જેના કારણે પ્રવાસી ટીમને જીતવા 612 રનનો ટાર્ગેટ મળ્યો હતો. તેની સામે પૂરી ટીમ માત્ર 119 રનમાં જ ખખડી ગઈ હતી.

સાઉથ આફ્રિકાએ પ્રથમ ઇનિંગમાં માર્કરામના 152 અને બાવુમાના અણનમ 95 રનની મદદથી 488 રન નોંધાવ્યા હતા. કમિન્સે 5 અને લાયને 3 વિકેટ લીધી હતી. જ્યારે ઓસ્ટ્રેલિયાએ પ્રથમ ઇનિંગમાં કેપ્ટન ટીમ પેનીના 62 અને ઉસ્માન ખ્વાજાના 53 રનની મદદથી 221 રન નોંધાવ્યા હતા. સાઉથ આફ્રિકા વતી ફિલાન્ડર, મહારાજા અને રબાડાએ 3-3 વિકેટ લીધી હતી.