SAFF Championship India vs Nepal: સૈફ ચેમ્પિયનશિપમાં ભારતીય ફૂટબોલ ટીમનું સર્વશ્રેષ્ઠ પ્રદર્શન સતત જોવા મળી રહ્યું છે. નેપાળ સામેની મેચમાં 2-0થી જીત મેળવીને ટીમે આ ચેમ્પિયનશિપની સેમીફાઈનલમાં પોતાનું સ્થાન નિશ્ચિત કરી લીધું છે. ભારત માટે બીજી ગ્રુપ મેચમાં કેપ્ટન સુનીલ છેત્રી અને મહેશ સિંહે ગોલ કર્યા હતા. આ મેચ દરમિયાન બંને ટીમના ખેલાડીઓ વચ્ચે ભારે તણાવ જોવા મળ્યો હતો. મેચમાં બંને ટીમના ખેલાડી એકબીજા સાથે મારામારી કરતા જોવા મળ્યા હતા.
આ મેચની 64મી મિનિટ દરમિયાન બંને ટીમના ખેલાડીઓ એકબીજા સાથે મારામારી કરતા જોવા મળ્યા હતા. આ ઘટનાનો વીડિયો સોશિયલ મીડિયા પર વાયરલ થઈ રહ્યો છે. વાસ્તવમાં ભારતના રાહુલ ભેકે અને નેપાળના બિમલ ઘરતી વચ્ચે એક હેડરને લઈને દલીલ થઈ હતી. આ દરમિયાન બંને ખેલાડીઓ વચ્ચે બોલાચાલી થઈ હતી. આ પછી રેફરીએ વચ્ચે આવીને બંને ટીમના ખેલાડીઓને શાંત કરવા પડ્યા હતા.
ભારતે પ્રથમ મેચમાં પાકિસ્તાનને હરાવ્યું હતું
સૈફ ચેમ્પિયનશિપમાં ભારતીય ટીમે તેની પ્રથમ મેચ પાકિસ્તાન સામે રમી હતી. આ મેચમાં કેપ્ટન સુનીલ છેત્રીએ સતત 3 ગોલ માર્યા હતા. ભારતે પાકિસ્તાન સામેની મેચમાં 4-0થી જીત મેળવી હતી. એશિયન ફૂટબોલમાં સૌથી વધુ ગોલ કરવાના મામલે સુનીલ છેત્રી હવે બીજા સ્થાને છે. ભારત અને કુવૈત હવે પ્રથમ સ્થાન મેળવવા માટે 27 જૂને એકબીજા સામે ટકરાશે. જ્યારે પાકિસ્તાન અને નેપાળ એ જ દિવસે ડેડ રબર મુકાબલામાં રમશે.
સૈફ ચેમ્પિયનશિપના બીજા ગ્રુપની ચારેય ટીમો સેમિફાઇનલની રેસમાં છે. તમામ ટીમોએ તે ગ્રુપમાં અત્યાર સુધી 1-1 મેચ રમી છે. જેમાં લેબનોન અને માલદીવે પોતપોતાની મેચ જીતી લીધી છે. જ્યારે બાંગ્લાદેશ અને ભૂતાનને હારનો સામનો કરવો પડ્યો છે.
ભારતીય ફૂટબોલ ટીમે SAFF ચેમ્પિયનશિપમાં જીત સાથે શરૂઆત કરી હતી. બુધવારે (21 જૂન) બેંગ્લોરના શ્રીકાંતિરાવા સ્ટેડિયમમાં કટ્ટર હરીફ પાકિસ્તાનને 4-0થી હરાવ્યું હતું. ભારત માટે આ મેચનો હીરો કેપ્ટન સુનીલ છેત્રી રહ્યો હતો. તેણે શાનદાર પ્રદર્શન કર્યું અને પાકિસ્તાન સામે ગોલનો વરસાદ કરી દીધો હતો. છેત્રીએ હેટ્રિક ફટકારી હતી. તેના સિવાય ઉદંતા સિંહે એક ગોલ કર્યો હતો.