નવી દિલ્હીઃ અમેરિકા અને ઓમાનને પ્રથમ વખત ઇન્ટરનેશનલ વનડે ટીમનો દરજ્જો મળ્યો છે. આઈસીસીએ બુધવારે તેની સત્તાવાર જાહેરાત કરી. આઈસીસી મેન્સ ક્રિકેટ વર્લ્ડ કપ લીગ-2 મેચમાં ઓમાને પોતાની ત્રણ મેચ અને અમેરિકાએ બે મેચમાં જીત નોંધાવી હતી. અમેરિકાની આ જીતમાં ભારતીય ક્રિકેટરનો મહત્ત્વનો ફાળો છે.
આઈસીસીએ ઓમાન અને અમેરિકાને વનડે ઈન્ટરનેશનલ ક્રિકેટનો દરજ્જો આપ્યા બાદ ટ્વીટર પર શુભકામના પણ પાઠવી હતી. ICCએ અમેરિકાના કેપ્ટન, ધ ફર્સ્ટ એવેન્જર્સના પોસ્ટરમાં એડિટ કરતા શુભકામના પાઠવી છે. આ સાથે જ ઓમાન ટીમનો ફોટો સોશિયલ મીડિયા પર પોસ્ટ કરી શુભકામના પાઠવી છે.
હાલમાં અમેરિકાની ટીમના કેપ્ટન રહેલ સૌરભ નેત્રાવલકર ભારતની અંડર-19 ટીમનો ભાગ રહી ચુકેલો છે. આ 27 વર્ષિય ખેલાડીએ મુંબઈ માટે રણજી મેચ રમી છે. સાથે 2010માં થયેલા અંડર-19 વર્લ્ડકપમાં ભારત માટે રમતા તેણે ઈંગ્લેન્ડ ટેસ્ટ ટીમના કેપ્ટન જો રૂટ અને પાકિસ્તાન ખેલાડી અહમદ શહનાઝની વિકેટ પણ લીધી હતી.