નવી દિલ્હીઃભારતીય ક્રિકેટના કેપ્ટન વિરાટ કોહલીને ઇન્ટરનેશનલ ક્રિકેટ કાઉન્સિલે મોટો ઝટકો આપ્યો છે. વિરાટ કોહલીને સાઉથ આફ્રિકા વિરુદ્ધ ત્રીજી ટી-20 મેચ દરમિયાન મેદાન પર ખરાબ વર્તન કરવા બદલ ચેતવણી આપવામાં આવી છે. કોહલી સાથે જ આઇસીસીએ એક ડિમેરિટ પોઇન્ટ પણ આપ્યો હતો. વાસ્તવમાં કોહલીએ બેંગલુરુમાં સાઉથ આફ્રિકા સામે રમાયેલી ત્રીજી ટી-20 મેચ દરમિયાન સાઉથ આફ્રિકી બોલર બ્યૂરેન હેંડ્રિક્સ સાથે ખભો ટકરાવ્યો હતો. ત્યારબાદ સજાના ભાગ રૂપે આઇસીસીએ કોહલીને મેદાન પર ખરાબ વ્યવહાર માટે અનુશાસનાત્મક રિકોર્ડમાં એક નેગેટિવ પોઇન્ટ જોડ્યો હતો. કોહલીએ આ હરકત બાદ આઇસીસીની કોડ ઓફ કંડક્ટ અનુસાર લેવલ-1નો દોષિત માનવામાં આવ્યો હતો. સપ્ટેમ્બર 2016માં આઇસીસીના નવા નિયમો લાગુ થયા બાદ આ ત્રીજી એવી ઘટના છે જ્યારે કોહલીને રેકોર્ડમાં નેગેટિવ પોઇન્ટ જોડવામાં આવ્યો છે. વાસ્તવમાં રવિવારે રમાયેલી મેચમાં વિરાટ કોહલી હેંડ્રિક્સના એક બોલ પર રન દોડી રહ્યો હતો ત્યારે હેંડ્રિક્સ તેના રસ્તામાં આવી ગયો હતો. બાદમાં હેંડ્રિક્સ સાથે કોહલી ટકરાઇ ગયો હતો.