1999માં ભારત સામે કરી હતી વન ડે કરિયરની શરૂઆત
ગેલે 1999માં ભારત સામે કેનેડાના ટોરેન્ટોમાં વન ડે કરિયરની શરૂઆત કરી હતી. 20 વર્ષની કરિયર દરમિયાન તેણે 284 આંતરરાષ્ટ્રીય મેચ રમી છે. જેમાં 37.12ની સરેરાશ અને 85.82ના સ્ટ્રાઇક રેટ સાથે 9727 રન બનાવ્યા છે. આ દરમિયાન તેણે 23 સદી અને 49 અડધી સદી પણ ફટકારી છે. વેસ્ટ ઈન્ડિઝ તરફથી વનડેમાં બ્રાયન લારા પછી વિન્ડીઝ માટે સૌથી વધુ રન કરનાર બેટ્સમેન પણ છે. બ્રાયન લારાના નામે 299 વનડેમાં 10,405 રન છે.
વર્લ્ડકપમાં બેવડી સદી ફટકારનારો પ્રથમ બેટ્સમેન
ગેલે 2015ના વર્લ્ડકપ દરમિયાન ઝિમ્બાબ્વે સામે લીગ રાઉન્ડમાં 215 રનની વિસ્ફોટક ઈનિંગ રમી હતી. વર્લ્ડકપના ઇતિહાસમાં બેવડી સદી ફટકારનો તે પ્રથમ ખેલાડી બન્યો હતો. આ ઉપરાંત વન ડે ક્રિકેટમાં વેસ્ટ ઈન્ડિઝ તરફથી બેવડી સદી ફટકારનારો પ્રથમ ખેલાડી છે. ગેલે બેટિંગની સાથે બોલિંગ પણ તેની કમાલ બતાવી છે. તેણે 284 વન ડેમાં 165 વિકેટ પણ ઝડપી છે. વન ડે તેણે 120 કેચ પણ ઝડપ્યા છે. કાર્લ હૂપર અને બ્રાયન લારા સાથે વિન્ડીઝ માટે સૌથી વધુ કેચ કરનાર ખેલાડીઓના લિસ્ટમાં સંયુક્ત રૂપે પ્રથમ સ્થાને છે.
IPLમાં પણ બતાવ્યો છે દમ
ક્રિસ ગેલ ઇન્ડિયન પ્રીમિયર લીગ (આઈપીએલ)માં હાલ કિંગ્સ ઇલેવન પંજાબ માટે રમે છે. તે આઈપીએલની 11 સિઝન પૈકી 10 સિઝનમાં રમ્યો છે. 2008માં તે પહેલી સિઝનમાં કોઈ ટીમનો ભાગ નહોતો. 10 સિઝનમાં તેણે 112 મેચમાં 3994 રન બનાવ્યા છે. તે આઈપીએલમાં સર્વાધિક રન કરનાર વિદેશી ખેલાડીઓની યાદીમાં બીજા સ્થાને છે.