Gujarat Rain Forecast | ગુજરાતમાં આજે ગાજવીજ સાથે ભારે વરસાદની આગાહી | ABP Asmita

Gujarat Rain Forecast:હવામાન વિભાગના કહેવા પ્રમાણે બંગાળની ખાડીમાં સર્જાયેલું ડીપ ડિપ્રેશન ધીરે-ધીરે આગળ વધી રહ્યું છે, 9 સપ્ટેમ્બરના બપોર સુધીમાં તે 6 કલાકમાં 8થી 10 કિલોમીટર આગળ વધ્યું હતું. હાલ તે ઓડિશા અને આંધ્ર પ્રદેશના દરિયાકાંઠા નજીક છે. આ સિસ્ટમની અસરથી  દેશના કેટલાક રાજ્યોમાં વરસાદનું અનુમાન છે. હવામાન વિભાગે આજે મધ્ય અને દક્ષિણ ગુજરાતમાં વરસાદનું યલો એલર્ટ આપ્યું છે.

હવામાન વિભાગની આગાહી મુજબ કચ્છ-સૌરાષ્ટ્રને સિવાય રાજ્યના તમામ ઝોનમાં આજે વરસાદ વરસી શકે છે.  ઉત્તર ગુજરાત, મધ્ય ગુજરાત અને દક્ષિણ ગુજરાતના તમામ જિલ્લાના છુટાછવાયા સ્થળો પર ભારે વરસાદની આગાહી કરવામાં આવી છે.

દક્ષિણ ગુજરાતના તમામ જિલ્લામાં આજે વરસાદનું હવામાન વિભાગે યલો એલર્ટ જાહેર કર્યુ છે.  ભરૂચ, નર્મદા, સુરત, તાપી,નવસારી, વલસાડ અને ડાંગ જિલ્લાના છુટાછવાયા સ્થળો પર  ભારે વરસાદ વરસી શકે છે.મધ્ય ગુજરાતના 8 જિલ્લામાં આજે  ભારે વરસાદ વરસી શકે છે. . આણંદ, વડોદરા, ખેડા, દાહોદ, પંચમહાલ, મહીસાગર અને છોટા ઉદેપુર જિલ્લામાં  પણ ભારે વરસાદની આગાહીને પગલે યલો એલર્ટ જાહેર કરવામાં આવ્યું છે.