Bitcoin Case: ચકચારી બીટકોઇન કેસમાં પૂર્વ ધારાસભ્ય કોટડિયા સહિત 14ને આજીવન કેદની સજા, જુઓ અહેવાલ
Bitcoin Case: ચકચારી બીટકોઇન કેસમાં પૂર્વ ધારાસભ્ય કોટડિયા સહિત 14ને આજીવન કેદની સજા, જુઓ અહેવાલ
અમદાવાદ: ગુજરાતના ઇતિહાસમાં સૌથી ચર્ચિત અને અનોખા કૌભાંડો પૈકીના એક એવા બિટકોઈન કેસમાં અમદાવાદની સ્પેશિયલ કોર્ટે પૂર્વ ધારાસભ્ય નલિન કોટડિયા, પૂર્વ એસ.પી. જગદીશ પટેલ, પૂર્વ પી.આઈ. આનંદ પટેલ સહિત કુલ 14 આરોપીઓને આજીવન કેદની સજા ફટકારી છે. 2018ના વર્ષમાં સામે આવેલા આ કૌભાંડે પોલીસ અધિકારીઓ અને રાજકારણીઓની સંડોવણીને કારણે સમગ્ર રાજ્યમાં સનસનાટી મચાવી દીધી હતી. તમને જણાવી દઈએ કે, પોલીસ અધિકારીઓએ શૈલેષ ભટ્ટનું અપહરણ કરી 200 બિટકોઈન પડાવી 32 કરોડ ખંડણી માગી હતી.
આ કૌભાંડની શરૂઆત સુરતના બિલ્ડર શૈલેષ ભટ્ટ સાથે થઈ હતી. શૈલેષ ભટ્ટ પર આરોપ હતો કે તેણે સુરતના ધવલ માવાણી પાસેથી 150 કરોડના બિટકોઈન, 11,000 લાઇટકોઈન અને 14.5 કરોડ રૂપિયાની ખંડણી ઉઘરાવી હતી. આ રકમ તેણે બીટ કનેક્ટ કંપનીના હોદ્દેદારોનું અપહરણ કરીને મેળવી હતી.
શૈલેષ ભટ્ટે આ બિટકોઈન મેળવ્યાની જાણકારી તત્કાલીન ધારાસભ્ય નલિન કોટડિયા અને તેમના સાથીઓ કેતન પટેલ અને કિરીટ પાલડિયાને થઈ. આ ત્રણેયે શૈલેષ ભટ્ટ પાસેથી બિટકોઈન પડાવી લેવાનો પ્લાન બનાવ્યો. આ યોજનામાં કેતન પટેલ અને નલિન કોટડિયાએ અમરેલી પોલીસના તત્કાલીન એસ.પી. જગદીશ પટેલ સાથે હાથ મિલાવ્યા. યોજના મુજબ, શૈલેષ ભટ્ટનું ગાંધીનગરથી અપહરણ કરી તેને એક ફાર્મ હાઉસમાં ગોંધી રાખવામાં આવ્યો. આ દરમિયાન તેની પાસેથી પહેલાં સીબીઆઈ ઇન્સ્પેક્ટર સુનીલ નાયર દ્વારા અંદાજે રૂ. 5 કરોડ રોકડા પડાવ્યા હતા.