Gujarat Rains Forecast: રાજ્યમાં હજુ પાંચ દિવસ વરસશે ભારે વરસાદ: હવામાન વિભાગની આગાહી

રાજ્યમાં હજુ પાંચ દિવસ વરસશે ભારે વરસાદની હવામાન વિભાગે આગાહી કરી છે. અરબી સમુદ્રમાં અપર એર સાયક્લોનિક સર્ક્યુલેશન અને મોન્સૂન ટ્રફ સક્રિય થવાને કારણે વરસાદ વરસશે. હવામાન વિભાગના મતે બે સિસ્ટમની સંયુક્ત અસરના કારણે રાજ્યમાં પાંચ દિવસ સુધી ગાજવીજ સાથે વરસાદ વરસશે. આજે સાબરકાંઠા, જૂનાગઢ, ગીર સોમનાથ, નવસારી, વલસાડ ઉપરાંત સંઘપ્રદેશ દીવ, દમણ અને દાદરાનગર હવેલીમાં ભારે વરસાદની શક્યતાને લઈ ઓરેન્જ એલર્ટ અપાયું છે. તો બનાસકાંઠા, મહેસાણા, ગાંધીનગર, અરવલ્લી, મહિસાગર, ભાવનગર, અમરેલી, રાજકોટ, પોરબંદર, સુરત, તાપી અને ડાંગ એમ બાર જિલ્લામાં મધ્યમ વરસાદને લઈ યલો એલર્ટ અપાયું છે.  હાલમાં અરબી સમુદ્રમાં અપર એર સાયક્લોનિક સર્કયુલેશનના કારણે તમામ બંદરો પર ત્રણ નંબરનું સિગ્નલ લગાવી દેવાયું છે. માછીમારોને આગામી પાંચ દિવસ હવામાન વિભાગે દરિયો ન ખેડવા સૂચના આપી છે. રાજ્યમાં અત્યાર સુધીમાં સિઝનનો 77 ટકાથી વધુ વરસાદ વરસી ચૂક્યો છે.