અમદાવાદમાં કાર ચાલકે તાપણું કરતી બાળકીને કચડી, ઘટનાસ્થળે જ થયું મોત

અમદાવાદ: રવિવારે સવારે અમદાવાદના વાડજ વિસ્તારમાં કારચાલકે અડફેટે લેતાં એક બાળકીનું મોત નિપજ્યું હતું જ્યારે એક અન્ય બાળકીને ઈજા પહોંચી હતી. સવારે ઘરની બહાર તાપણું કરી રહેલી 11 વર્ષીય ધ્રુવીને કારચાલકે અડફેટે લેતાં તેનું મોત નિપજ્યું હતું. ઘટનાને પગલે મોટી સંખ્યામાં સ્થાનિકો ઉમટી પડ્યાં હતાં. પોલીસે કારચાલકની ધરપકડ કરી ગુનો દાખલ કર્યો છે.

પીએસઆઇના જણાવ્યા અનુસાર, સવારે એક કાર ચાલક ભીમજીપુરાથી વિજય ક્રોસ રોડ તરફ જઈ રહ્યો હતો. તે દરમિયાન વિજય ક્રોસ રોડ પાસે કાર ચાલકે બે બાળકીને અડફેટે લીધી હતી. જેમાં એક બાળકીનું ઘટનાસ્થળે મોત નિપજ્યું હતું જ્યારે બીજી બાળકીને ઇજા પહોંચતા હોસ્પિટલ ખસેડવામાં આવી છે.

હાલ ફરિયાદ નોંધવાની પ્રક્રિયા ચાલુ છે. અકસ્માત થતાં જ આસપાસના લોકો ઘરમાંથી દોડી આવ્યા હતાં. ધ્રુવી તેના ઘરની બહાર તાપણું કરી રહી હતી તે દરમિયાન એક કારચાલક પૂરપાટ ઝડપે કાર લઈને આવ્યો અને રિવર્સ લેતી વખતે કેટલાંક વાહનોને ટક્કર મારી હતી.

ત્યાર બાદ બે બાળકીઓને અડફેટે લીધી હતી. ઘટનાને પગલે દોડી આવેલી પોલીસે કારચાલકની ધરપકડ કરી હતી. ઉપરાંત કાર કબજે કરી આગળની કાર્યવાહી હાથ ધરી છે.