અમદાવાદના 6 વેપારી બાવળામાં મહેફિલ માણતા ઝડપાયા

અમદાવાદ: શહેરના છ વેપારી બાવળાની ઢેઢાળ ચોકડી પાસે આવેલા એક ટ્રાન્સપોર્ટના ગોડાઉનમાંથી દારૂ પીધેલી હાલતમાં ઝડપાયા છે. બાવળા પોલીસે ગત રાત્રે બાતમીના આધારે ઝડપી લઇ કાયદેસરની કાર્યવાહી હાથ ધરી હતી. જોકે પોલીસને ગોડાઉનમાંથી કોઇ દારૂની બોટલ કે મુદ્દામાલ મળ્યો ન હતો. જેથી પોલીસ કામગીરી પર પણ શંકા છે કે માત્ર ગોડાઉનમાં ખાલી બોટલ કે વાહન ન મળ્યાં અને પીધેલી વ્યક્તિઓ જ મળી?

સૂત્રોના જણાવ્યા મુજબ છએય શખસ ટ્રાન્સપોર્ટના વ્યવસાય સાથે સંકળાયેલા છે. પોલીસે તમામ સામે કાયદેસરની કાર્યવાહી હાથ ધરી છે. જોકે પોલીસને ગોડાઉનમાંથી કોઇ ખાલી કે ભરેલી દારૂની બોટલ તેમજ વાહન પણ મળી આવ્યાં ન હતાં. જેથી પોલીસની કામગીરી પર શંકા છે કે ખરેખર મહેફિલ માણતા ઝડપ્યા છે કે માત્ર પીધેલા હોવાનો જ કેસ કરી પતાવટ કરી દીધી છે.

બાવળા પોલીસને બાતમી મળી હતી કે નીતિન ટ્રાન્સપોર્ટનાં ગોડાઉનમાં કેટલાક લોકો દારૂની મહેફીલ માણી રહ્યા છે. તેના આધારે પોલીસે ગોડાઉન પર દરોડો પાડી જમનુરામ લવજીરામ કાનજાની, પ્રદીપ જમનુરામ કાનજાની (બંને રહે. સી.જી. રોડ), તરુણ ગોપીકિશન મહેશ્વરી (રહે. મુંબઇ) અસિત ડાહ્યાભાઇ પટેલ (રહે. કૃષ્ણબાગ ચાર રસ્તા, મણિનગર), ભરત ગોરધન ઠક્કર (રહે. ઘોડાસર) અને જિજ્ઞેશ પંકજ જાની (રહે. નિકોલ)ને ઝડપી લીધા હતા.