E20 Janta Party Movement: ભારતમાં આજકાલ E20 (ઇથેનોલ-મિશ્રિત) પેટ્રોલને લઈને એક નવી જ ચર્ચા અને વિવાદનો દોર શરૂ થઈ ગયો છે. વાહનચાલકો અને સામાજિક કાર્યકરોનો એક મોટો વર્ગ હવે સરકારની આ E20 નીતિનો ખુલ્લીને વિરોધ કરી રહ્યો છે. તાજેતરમાં દિલ્હીમાં ચર્ચામાં આવેલી 'કોકરોચ જનતા પાર્ટી' પરથી પ્રેરણા લઈને 'E20 જનતા પાર્ટી' નામના એક નવા જૂથે ગ્રાહકોના હિત માટે મોરચો ખોલ્યો છે. તેમની મુખ્ય માંગ એ છે કે ગ્રાહકોને ફરજિયાત E20 પેટ્રોલ ધાબડી દેવાને બદલે 100% શુદ્ધ પેટ્રોલ ખરીદવાનો વિકલ્પ પણ મળવો જોઈએ. આ ઝુંબેશ એટલી ઉગ્ર બની છે કે કેટલાક વિરોધીઓ અને વિપક્ષી નેતાઓએ કેન્દ્રીય મંત્રી નીતિન ગડકરીના રાજીનામાની માંગ કરી દીધી છે. જોકે, બીજી તરફ ગડકરીએ આ તમામ આક્ષેપોને ફગાવીને સરકારના ઇથેનોલ મિશ્રણ કાર્યક્રમનો મક્કમતાથી બચાવ કર્યો છે.
વાહનોને નુકસાન અને ગડકરીના રાજીનામાની માંગ કેમ?
વિરોધ કરી રહેલા લોકોની સૌથી મોટી ચિંતા E20 પેટ્રોલથી વાહનો પર પડતી ગંભીર અસરોને લઈને છે. ટીકાકારોનું સ્પષ્ટ કહેવું છે કે E20 ઇંધણના ઉપયોગથી કેટલાક વાહનોની માઇલેજમાં 8% થી 15% સુધીનો મોટો ઘટાડો નોંધાયો છે. આટલું જ નહીં, જૂના વાહનોમાં કાટ લાગવાની સમસ્યા વધી છે અને એન્જિન, ફ્યુઅલ પંપ તેમજ ફ્યુઅલ ટાંકીમાં ઘસારો ઝડપથી થઈ રહ્યો છે. સરવાળે, વાહન માલિકો માટે વાહન પાછળનો મેન્ટેનન્સ (જાળવણી) નો ખર્ચ આસમાને પહોંચી ગયો છે.
આ ઉપરાંત, કાર્યકરો અને વિપક્ષોએ હિતોના સંઘર્ષ (Conflict of Interest) નો એક ગંભીર મુદ્દો પણ ઉઠાવ્યો છે. તેઓ એવો દાવો કરી રહ્યા છે કે કેન્દ્રીય મંત્રી નીતિન ગડકરીના પરિવારના સભ્યોના વ્યવસાયોને આ ઇથેનોલ મિશ્રણ નીતિથી સીધો અને મોટો ફાયદો થઈ શકે તેમ છે. આ જ આક્ષેપોના આધારે વિરોધીઓ વધુ પારદર્શિતાની માંગ સાથે તેમના રાજીનામા પર અડી ગયા છે.
ગ્રાહકોને મળવો જોઈએ પસંદગીનો અધિકાર
આ આખી ઝુંબેશની સૌથી મહત્વની અને વ્યાજબી માંગ એ છે કે ગ્રાહકોને E20 ઇંધણ અને 100% શુદ્ધ પેટ્રોલ વચ્ચે પોતાની મરજીથી પસંદગી કરવાની સંપૂર્ણ સ્વતંત્રતા મળવી જોઈએ. વિરોધીઓની દલીલ છે કે બજારમાં હવે રેગ્યુલર પેટ્રોલ સરળતાથી મળતું નથી અને જ્યાં મળે છે ત્યાં તે ખૂબ જ ઊંચા ભાવે વેચાઈ રહ્યું છે. વાહનચાલકો ઈચ્છે તો તેમને કોઈ પણ જાતના દબાણ વગર 100% પેટ્રોલ (અનબ્લેન્ડેડ) ખરીદવાનો વિકલ્પ હોવો જ જોઈએ.
આ પણ વાંચોઃ E20 Petrol: જો ઇથેનોલથી જૂની કારનું એન્જિન બગડશે તો ઇન્સ્યોરન્સ ક્લેમ મળશે? જાણો નિયમ
મુદ્દા પર રાજકીય દબાણ વધ્યું
હવે આ સમગ્ર વિવાદે એક મોટો રાજકીય વળાંક લઈ લીધો છે. તાજેતરમાં જ શિક્ષણ મંત્રી ધર્મેન્દ્ર પ્રધાનના રાજીનામા બાદ, વિપક્ષો અને વિરોધ કરનારાઓને નવું બળ મળ્યું છે. તેમણે E20 ઇંધણ નીતિની જવાબદારી નિશ્ચિત કરવા માટે નીતિન ગડકરી અને પેટ્રોલિયમ મંત્રી હરદીપ સિંહ પુરી પર ભારે દબાણ વધારી દીધું છે.
સરકારે આક્ષેપો પર શું કહ્યું?
આ તમામ વિવાદો અને રાજીનામાની માંગ વચ્ચે નીતિન ગડકરીએ પોતાની સામે લાગેલા તમામ આરોપોને પાયાવિહોણા ગણાવીને સંપૂર્ણપણે ફગાવી દીધા છે. તેમણે આ 'E20 જનતા પાર્ટી' ની ઝુંબેશને એક 'પેઇડ ઝુંબેશ' (પૈસા આપીને ચલાવાતી ચળવળ) ગણાવી છે. ગડકરીએ સીધો આરોપ લગાવ્યો છે કે આ બધું 'પેટ્રોલ લોબી' નું કાવતરું છે, જે ભારતને સ્વચ્છ અને ગ્રીન ઉર્જા તરફ આગળ વધતું રોકવા માંગે છે.
આ પણ વાંચોઃ શું E20 પેટ્રોલથી તમારી ગાડીની માઇલેજ ઘટી રહી છે? જાણો શું છે હકીકત?
Car loan Information:
Calculate Car Loan EMI