જામનગરઃ લાલપુરના ઝાખર ગામની સીમમાંથી યુવતીની હત્યા કરાયેલી લાશ મામલે ચોંકાવનારી વિગતો સામે આવી છે. યુવતી નર્સ હોવાનું અને કોવિડ હોસ્પિટલમાં ફરજ બજાવતી હોવાનું સામે આવ્યું છે. એટલું જ નહીં, યુવતીની હત્યા તેના જ પ્રેમીએ કરી હોવાનું સામે આવતાં પોલીસ પણ ચોંકી ઉઠી હતી. યુવતીના ભાઈના સાળા એવા તેના પ્રેમીએ જ હત્યા કરી હોવાનો ધડાકો થયો છે.
જામનગર (Jamnagar)ની સ્વામિનારાયણ કોવિડ હોસ્પિટલમાં નર્સ (Nurse) તરીકે ફરજ બજાવતી 22 વર્ષીય સીમા કલ્યાણપુર તાલુકાની વતની છે. તેમજ જામનગર-ખંભાળિયા હાઈવે પર આવેલી કોવિડ હોસ્પિટલ (Covid hospital) માં ફરજ બજાવતી હતી અને તેની જ હોસ્પિટલમાં રહેતી હતી.
ગત 13મી મેના રોજ સહી કરીને યુવતી બહાર નીકળી હતી. આ પછી બીજા દિવસે 14મીએ તેની લાશ મળી આવી હતી. યુવતીએ પહેરેલા કપડા પરથી તેની સાથે રહેતી અને નર્સ તરીકે ફરજ બજાવતી અન્ય યુવતીએ લાશ ઓળખી કાઢી હતી. યુવતી તેની બહેનપણીના કપડા પહેરીને ગઈ હોવાથી તેની ઓળખ થઈ હતી.
પોલીસ પાસેથી મળતી વિગતો પ્રમાણે, યુવતીની ઓળખ થયા પછી ગુમ થયેલા મોબાઇલની ડીટેઇલ તપાસવામાં આવી હતી. દરમિયાન યુવતીને મીઠાપુરના યુવક સાથે સંબંધ (Love) હોવાનું ખૂલ્યું હતું. પોલીસે તેની અટક કરી પૂછપરછ કરતાં તે યુવતીના મોટાભાઈનો સાળો હોવાનું અને બંને દોઢ વર્ષથી પ્રેમમાં હોવાનું જણાવ્યું હતું. તેમજ પોતે યુવતી સાથે લગ્ન (Marriage) કરવા માંગતો હોવાનું પણ જણાવ્યું હતું.
યુવકે પોલીસને જણાવ્યું હતું કે, પ્રેમિકાને અન્ય યુવક સાથે પણ સંબંધ હતા. જેને કારણે બંને વચ્ચે ઝઘડો થયો હતો. ગત 13મી મેના રોજ બંને ફરીને પરત આવી રહ્યા હતા ત્યારે આ મુદ્દે જ ઝઘડો થતાં યુવકે પ્રેમિકાની હત્યા કરી નાંખી હતી. યુવકે હત્યાની કબૂલાત કરતાં કોવિડ ટેસ્ટ બાદ તેની વિધિવત રીતે ધરપકડ કરવાની કામગીરી હાથ ધરાઈ છે.