મુંબઈઃ માયાનગરી મુંબઈના અંધેરી સ્થિત ડી.એન.નગર પોલીસ સ્ટેશનમાં અભિનેતા રજત બેદી સામે લાપરવાહીતી ગાડી ચલાવવાનો અને એક શખ્સને કારથી ટક્કર મારીને ઘાયલ કરવાના આરોપમાં એફઆઈઆર નોંધાઈ છે, મુંબઈ પોલીસને મળેલી જાણકારી મુજબ, એકટર રજત બેદી સોમવારે સાંજે 6 વાગે જૂહુ-અંધેરી વિસ્તારમાંથી પસાર થતો હતો ત્યારે તેની કાર પગપાળા જઈ રહેલા શખ્સને ટક્કર મારી હતી.
શું કહ્યું પોલીસે
ડી.એન.નગર પોલીસ સ્ટેશનના વરિષ્ઠ અધિકારી મિલિંદ કુરદેએ જણાવ્યું કે, એકટર ખુદ ગાડી ચલાવતો હતો અને સડક પાર કરી રહેલા રાજેશ ધૂત નામના શખ્સને ટક્કર મારી હતી. ઘટના બાદ એકટરે ખુદ પીડિતને નજીકની કુપર હોસ્પિટલમાં દાખલ કરાવ્યો હતો. પીડિત પરિવારની ફરિયાદના આધારે પોલીસે આઈપીસીની કલમ 279 અને 338 અંતર્ગત મામલો નોંધી વધુ તપાસ શરૂ કરી છે.
રાજેશ ધૂતની હાલત નાજુક
અકસ્માતમાં ઘાયલ થયેલા રાજેશ ધૂતની હાલત નાજુક હોવાનું કહેવાય છે. ઘટનાની જાણકારી મળતાં જ સ્થાનિક પોલીસ કુપર હોસ્પિટલ પહોંચી ત્યારે એકેટર રજત ત્યાંથી નીકળી ગયો હતો. મુંબઈ પોલીસ ટૂંક સમયમાં તેનું નિવેદન નોંધી શકે છે. ઘટનાને સમજવા આ વિસ્તારના સીસીટીવી ચેક કરવામાં આવી રહ્યા છે.
કોઈ મિલ ગયાથી થયો જાણીતો
રિતિક રોશન અભિનિત ફિલ્મ કોઈ મિલ ગયાથી રજત બેદી ઘણો જાણીતો બન્યો હતો અત્યાર સુધીમાં તેણે 40થી વધુ ફિલ્મોમાં કામ કર્યુ છે.