how much tea to drink daily: ભારતમાં સવારની શરૂઆત ચા વિના સાવ અધૂરી માનવામાં આવે છે. કેટલાક લોકોને પથારીમાંથી ઊઠતાવેંત 'બેડ ટી' જોઈએ છે, તો કેટલાક લોકો કામની વચ્ચે આખો દિવસ ચાની ચુસકીઓ મારતા રહે છે. પરંતુ શું તમે ક્યારેય વિચાર્યું છે કે તમારી ઉંમર અને સ્વાસ્થ્ય પ્રમાણે તમારે દિવસમાં કેટલા કપ ચા પીવી જોઈએ? નિષ્ણાતોના મતે, જરૂર કરતાં વધુ ચા પીવાથી શરીરને ગંભીર નુકસાન થઈ શકે છે. ડોક્ટરો એમ નથી કહેતા કે ચા પીવાનું સાવ બંધ કરી દો, પણ તેનું યોગ્ય પ્રમાણ જાળવવું જરૂરી છે. ચાલો, આજે સમજીએ કે કઈ ઉંમરના લોકોએ કેટલી ચા પીવી જોઈએ અને તેના ફાયદા-ગેરફાયદા શું છે.
ચાના સ્વસ્થ વિકલ્પો: ગ્રીન ટીનો ટ્રેન્ડ
હેલ્થલાઇન વેબસાઇટની માહિતી મુજબ, ચામાં રહેલું કેફીન શરીરને એનર્જી તો આપે છે, પણ જો વધુ પડતું પીવામાં આવે તો તે નુકસાન પણ કરે છે. આજકાલ લોકો ગ્રીન ટી (Green Tea) તરફ વધુ વળ્યા છે, કારણ કે તેમાં 'કેટેચીન' નામનું એન્ટીઑકિસડન્ટ ભરપૂર માત્રામાં હોય છે.
ગ્રીન ટી પીવાથી હૃદય રોગ, ટાઇપ 2 ડાયાબિટીસ અને અમુક પ્રકારના કેન્સરનું જોખમ ઘટે છે.
રિસર્ચ દર્શાવે છે કે ગ્રીન ટી મેટાબોલિઝમ વધારીને ચરબી (વજન) ઘટાડવામાં પણ ખૂબ મદદરૂપ થાય છે.
દિવસમાં કેટલી ચા પીવી જોઈએ?
તો મોટો સવાલ એ છે કે ખરેખર કેટલી ચા પીવી યોગ્ય છે? આનો આધાર તમારી ઉંમર, સ્વાસ્થ્ય અને જીવનશૈલી પર રહેલો છે:
કિશોરો અને યુવાનો: આ ઉંમરના લોકોએ દિવસમાં 1 થી 2 કપથી વધુ કેફીનયુક્ત ચા પીવાનું ટાળવું જોઈએ.
સ્વસ્થ પુખ્ત વયના લોકો: એકદમ સ્વસ્થ વ્યક્તિઓ માટે દિવસમાં 3 થી 5 કપ ગ્રીન ટી પીવી સ્વાસ્થ્ય માટે ફાયદાકારક માનવામાં આવે છે.
આ પણ વાંચોઃ ભૂખ્યા રહ્યા વગર વજન ઉતારો! ફિટનેસ ઇન્ફ્લુએન્સરે 4 મહિનામાં 15 કિલો ચરબી ઓગાળવાનો દેશી જુગાડ બતાવ્યો
વધુ પડતી ચા પીવાના ગેરફાયદા
જો તમે લિમિટ કરતાં વધુ ચા પીઓ છો, તો શરીરમાં કેફીનનું પ્રમાણ વધે છે. ડોક્ટરો ચેતવણી આપે છે કે વધુ પડતી કેફીનથી શરીરમાં અનેક નુકસાન થઈ શકે છે:
બેચેની થવી અને ઊંઘ ન આવવી (અનિદ્રા).
માથાનો દુખાવો, પેટ ખરાબ થવું અને એન્ઝાયટી (ચિંતા) વધવી.
ખાસ કરીને સગર્ભા સ્ત્રીઓએ ચા પીવામાં ખૂબ ધ્યાન રાખવું જોઈએ, કારણ કે ગર્ભાવસ્થા દરમિયાન વધુ પડતું કેફીન જોખમ વધારી શકે છે.
નિષ્ણાતોના મતે, કોઈપણ વ્યક્તિએ દિવસભરમાં 300 મિલિગ્રામથી વધુ કેફીનનું સેવન ન કરવું જોઈએ.
આ પણ વાંચોઃ સમય નથી? તો હવે અઠવાડિયામાં માત્ર 1 દિવસની કસરતથી પણ ઘટાડી શકાશે વજન, નવા રિસર્ચમાં ધડાકો
આ વાતોનું પણ ખાસ ધ્યાન રાખો
નિષ્ણાતો કહે છે કે માત્ર ચાની સંખ્યા જ નહીં, પણ ચા પીવાનો 'સમય' પણ સૌથી વધુ મહત્વનો છે.
ખાલી પેટે: ક્યારેય સવારે સીધી ખાલી પેટે ચા ન પીવી, તેનાથી એસિડિટી અને પાચનની ગંભીર સમસ્યાઓ થઈ શકે છે.
જમ્યા પછી તરત: જમ્યા પછી તરત જ ચા પીવાની આદત ટાળો, કારણ કે આમ કરવાથી શરીર ખોરાકમાંથી આયર્ન (Iron) બરાબર શોષી શકતું નથી.
ડિસ્ક્લેમર: આ માહિતી વિવિધ રિસર્ચ અને આરોગ્ય નિષ્ણાતોના મંતવ્યો પર આધારિત છે. આને કોઈ તબીબી સલાહનો વિકલ્પ ન સમજવો. તમારી દિનચર્યા કે ડાયેટમાં કોઈ પણ નવો ફેરફાર કરતા પહેલા હંમેશા તમારા ડૉક્ટરની સલાહ લેવી હિતાવહ છે.