Ahmedabad News: ગુજરાત સરકાર દ્વારા રત્ન કલાકારોને લઇને એક મોટો નિર્ણય લેવામાં આવ્યો છે. અમદાવાદના રત્ન કલાકારોના બાળકોને હવે સ્કૂલ ફીમાં સહાય મળશે. સરકારના નિર્ણય પ્રમાણે, બાળકને મહત્તમ રૂપિયા 13500ની સહાય મળશે. વાલીઓ અને વિદ્યાર્થીઓ પાસે અરજીઓ મંગાવવામાં આવી રહી છે, જેને આ યોજનાનો લાભ લેવો હશે તે આગામી 22 જુલાઈ સુધીમાં સ્કૂલમાં અરજી કરી શકશે. સરકારની સુચનાના પગલે સુરત બાદ હવે અમદાવાદ શહેર અને જિલ્લાની સ્કૂલોમા પણ અરજીઓ મગાવવાની પ્રક્રિયા શરૂ કરવામા આવી છે.
રાજ્ય સરકાર દ્વારા રત્નકલાકારોના બાળકોને ચાલુ વર્ષની સ્કૂલ ફી પેટે રૂ. 13500ની સહાય ચુકવવાનો નિર્ણય લેવામાં આવ્યો છે. જેથી સરકારની સુચનાના પગલે સુરત બાદ હવે અમદાવાદ શહેર અને જિલ્લાની સ્કૂલોમા પણ અરજીઓ મગાવવાની પ્રક્રિયા શરૂ કરવામા આવી છે. વાલીઓને સ્કૂલમાં અરજી રજૂ કરવા માટે 22 જુલાઈ સુધીની મૂદત આપવામાં આવી છે. વાલીઓ પાસેથી આવેલી અરજીઓ સ્કૂલો પાસેથી એકત્ર કરવા શહેર DEO કચેરીએ € 6 સ્થળ અને ગ્રામ્ય DEO કચેરીએ 7 સ્થળ નક્કી કર્યાં હોવાનું જાણવા મળે છે.
હીરા ઉદ્યોગ ક્ષેત્રમાં આંતરરાષ્ટ્રીય કક્ષાએ વિવિધ પરિબળોને કારણે અસરગ્રસ્ત રત્ન કલાકારો અને એકમોને સહાય આપવાનો સરકાર દ્વારા નિર્ણય લેવામાં આવ્યો હતો. જેને લઈને 24 મેના રોજ પરિપત્ર પણ જાહેર કરાયો હતો. પરિપત્ર અનુસાર, રત્ન ક્લાકારોના સંતાનોને વર્ષ 2025-26 માટે સ્કૂલ ફી પેટે રૂ. 13500 સુધીની સહાય ચુકવવામાં આવશે. જેના અનુસંધાને સુરતમાં અરજીઓ મગાવાની પ્રક્રિયા શરૂ કરી દેવામાં આવી છે. અમદાવાદ શહેર અને જિલ્લાના કારીગરોના સંતાનોને સહાય ચુકવવા માટે તાજેતરમાં ક્લેક્ટરના અધ્યક્ષસ્થાને એક બેઠક બોલાવવામાં આવી હતી. બેઠકમાં થયેલી ચર્ચા બાદ મંગળવારના રોજ અમદાવાદ શહેર અને ગ્રામ્ય DEO કચેરી દ્વારા તમામ સ્કૂલોને અરજીઓ મગાવવા માટે એક પરિપત્ર કરવામાં આવ્યો છે. પરિપત્ર અનુસાર, સરકારે નક્કી કરેલી ગાઈડલાઈન મુજબ વાલીઓએ 22 જુલાઈ સુધીમાં સ્કૂલોમાં અરજી કરી દેવાની રહેશે. સ્કૂલોમાં જે અરજીઓ આવશે તેને એકત્ર કરવા માટે જુદા જુદા સેન્ટર નક્કી કરવામાં આવ્યાં છે. આ સેન્ટરોમાં એકત્ર થયેલી અરજીઓ ડાયમંડ એસોસિએશનને આપવામાં આવશે. ડાયમંડ એસો. દ્વારા આવેલી તમામ અરજીઓની સ્ક્રુટીની કરશે અને એ પછી તમામ અરજીઓ જિલ્લા ઉદ્યોગની કચેરીમાં મોકલી આપવામાં આવશે. આ સહાય સીધી સ્કૂલના બેંક એકાઉન્ટમાં જ જમા થાય એવી વ્યવસ્થા કરવામાં આવશે.