Adani Group Beats Tata: Tata પણ આ મામલામાં અદાણી કરતા પાછળ, અદાણી જૂથની સંપત્તિમાં દર મહિને 64,000 કરોડ રૂપિયાનો વધારો થયો

અંબુજા સિમેન્ટ અને ACCને ખરીદ્યા બાદ હવે ગૌતમ અદાણીની નવ કંપનીઓ સ્ટોક એક્સચેન્જમાં લિસ્ટેડ છે

Adani Group Beats Tata: અદાણી ગ્રૂપે તેની ગ્રૂપ કંપનીઓના શેરમાં વધારાને કારણે માર્કેટ કેપની દ્રષ્ટિએ દેશના સૌથી જૂના ઔદ્યોગિક જૂથ ટાટા ગ્રૂપને પાછળ છોડી દીધું છે. અંબુજા સિમેન્ટ અને ACCને ખરીદ્યા બાદ હવે ગૌતમ અદાણીની નવ કંપનીઓ સ્ટોક એક્સચેન્જમાં લિસ્ટેડ છે. અને આ નવ કંપનીઓનું માર્કેટ કેપ 23.24 લાખ કરોડ રૂપિયા સુધી પહોંચી ગયું છે. જ્યારે ટાટા જૂથની કંપનીઓનું માર્કેટ કેપ રૂ. 20.84 લાખ કરોડ છે.

અદાણી ગ્રુપના દર મહિને રૂ. 64,000 કરોડ વધ્યા

2019ના અંતે અદાણી જૂથની તમામ લિસ્ટેડ કંપનીઓનું માર્કેટ કેપ માત્ર 2 લાખ કરોડ રૂપિયા હતું. પરંતુ છેલ્લા ત્રણ વર્ષથી ઓછા સમયમાં અદાણી ગ્રુપે તેના શેરધારકો માટે રૂ. 21.24 લાખ કરોડની સંપત્તિ એકઠી કરી છે. અદાણી ગ્રૂપે છેલ્લા 33 મહિનામાં શેરધારકો માટે દર મહિને સરેરાશ રૂ. 64000 કરોડની સંપત્તિ બનાવી છે. વિશ્વના કોઈપણ જૂથે શેરધારકોમાં આટલી ઝડપી સંપત્તિ ઉમેરી નથી. ટાટા જૂથે સમાન સમયગાળામાં શેરધારકો માટે રૂ. 9 લાખ કરોડ અને રિલાયન્સ ઇન્ડસ્ટ્રીઝે રૂ. 7.5 લાખ કરોડ ઉમેર્યા છે.

અદાણી ગ્રુપ 23.24 લાખ કરોડના માર્કેટ કેપ સાથે નંબર વન પર છે. તો ટાટા જૂથ રૂ. 20.84 લાખ કરોડ સાથે બીજા સ્થાને છે. રિલાયન્સ ઈન્ડસ્ટ્રીઝ 17.13 લાખ કરોડના માર્કેટ કેપ સાથે ત્રીજા સ્થાને છે. HDFC ગ્રુપ રૂ. 14.62 લાખ કરોડના માર્કેટ કેપ સાથે ચોથા સ્થાને છે. બજાજ ગ્રુપ રૂ. 9.37 લાખ કરોડ સાથે પાંચમા સ્થાને છે.

અદાણી જૂથની 9 કંપનીઓ લિસ્ટેડ

અદાણી ગ્રૂપની પ્રથમ સાત કંપનીઓ સ્ટોક એક્સચેન્જમાં લિસ્ટ થઈ હતી. પરંતુ હવે હોલસીમ પાસેથી અંબુજા સિમેન્ટ અને ACCને હસ્તગત કર્યા બાદ બંને કંપનીઓ અદાણી ગ્રૂપનો હિસ્સો બની ગઈ છે. તો તેના કારણે પણ અદાણી ગ્રુપનું માર્કેટ કેપ વધ્યું છે.