Arvind and Company IPO: બુધવારે શિપિંગ અને લોજિસ્ટિક્સ સેક્ટરની અરવિંદ એન્ડ કંપની શિપિંગના શેરનું શાનદાર લિસ્ટિંગ થયું હતું. IPO પછી લિસ્ટ થતાંની સાથે જ કંપનીના શેરોએ તેના રોકાણકારોને બમ્પર કમાણી કરાવી હતી. અરવિંદ એન્ડ કંપનીના શેર લગભગ 80 ટકાના પ્રીમિયમ સાથે બજારમાં લિસ્ટ થયા હતા.
અરવિંદ એન્ડ કંપનીના શેરનું લિસ્ટિંગ NSE ના SME પ્લેટફોર્મ પર કરવામાં આવ્યું હતું. કંપનીના શેર 80 રૂપિયાના ભાવે લિસ્ટ થયા હતા. આ IPOના 45 રૂપિયાની ઇશ્યૂ પ્રાઇઝ કરતાં 77.77 ટકા વધુ છે. જો આ રીતે જોવામાં આવે તો અરવિંદ એન્ડ કંપનીના IPOમાં રોકાણ કરનારા રોકાણકારોએ પહેલા દિવસે જ લગભગ 80 ટકા કમાણી કરી છે.
આટલો મોટો હતો કંપનીનો આઈપીઓ
શિપિંગ કંપનીએ 14.74 કરોડ રૂપિયાનો IPO રજૂ કર્યો હતો. કંપનીના આઈપીઓમાં 32 લાખ 76 હજાર શેરના ફ્રેશ ઈશ્યુનો સમાવેશ થાય છે. આઇપીઓમાં ઓફર ફોર સેલનો હિસ્સો નહોતો. આ IPO 12મી ઓક્ટોબરે ઓપન થયો હતો અને 16મી ઓક્ટોબર સુધી સબસ્ક્રિપ્શન માટે ખુલ્લો રહ્યો હતો. IPO પછી 19 ઓક્ટોબરે શેરની ફાળવણી કરવામાં આવી હતી. આઇપીઓમાં જેમને બિડ મળી નહોતી તેઓને 20 ઓક્ટોબરે રિફંડ આપવામાં આવ્યુ હતું, જ્યારે 23 ઓક્ટોબરે સફળ બિડર્સના ડીમેટ એકાઉન્ટમાં શેર જમા કરવામાં આવ્યા હતા.
અરવિંદ એન્ડ કંપનીના IPOમાં એક લોટમાં 3000 શેર સામેલ હતા. આનો અર્થ એ છે કે રોકાણકારોએ આ IPOમાં ઓછામાં ઓછા 1 લાખ 35 હજાર રૂપિયાનું રોકાણ કરવાની જરૂર હતી. લિસ્ટિંગ પછી એક લોટની કિંમત જોઈએ તો તે 2 લાખ 40 હજાર રૂપિયા થાય છે. આ રીતે IPO રોકાણકારોએ પ્રથમ દિવસે જ દરેક લોટ પર 1 લાખ 5 હજાર રૂપિયાની કમાણી કરી હતી.
શું છે કંપનીનો બિઝનેસ?
આ IPO પહેલા પ્રમોટર્સ અરવિંદ કાંતિલાલ શાહ, વિનીત અરવિંદ શાહ, પારુલ અરવિંદ શાહ અને ચિંતન અરવિંદ શાહ કંપનીમાં 100 ટકા હિસ્સો ધરાવતા હતા. IPO પછી પ્રમોટરોનો હિસ્સો ઘટીને 73 ટકા થઈ ગયો છે. આ કંપનીનું મુખ્ય મથક જામનગર, ગુજરાત ખાતે આવેલું છે. તાજેતરમાં શિપિંગ અને લોજિસ્ટિક્સ સિવાય કંપનીએ હોસ્પિટાલિટી બિઝનેસ પણ શરૂ કર્યો છે. કંપનીએ ગયા નાણાકીય વર્ષમાં 8.41 કરોડ રૂપિયાની આવક અને 3.47 કરોડ રૂપિયાનો નફો હાંસલ કર્યો હતો. કંપનીનો એમકેપ હાલમાં 55 કરોડ રૂપિયાની આસપાસ છે.